Витаминот Д е неопходен за здравјето, а бидејќи тешко се внесува доволно само преку исхраната, многумина прибегнуваат кон суплементи.
Но за да биде навистина ефективен, клучно е кога и како се зема. Додека дел од луѓето го земаат наутро, а други навечер, најважно е да се обезбеди правилна апсорпција.
Зошто витаминот Д е најдобро да се зема со оброк?
Витаминот Д е растворлив во масти, што значи дека не се раствора во вода, туку најдобро се апсорбира кога се комбинира со храна богата со здрави масти. Затоа се препорачува суплементите да се земаат со оброк за да имаат најголем ефект.
Студија на 17 испитаници покажа дека земањето витамин Д со најголемиот дневен оброк го зголемува нивото на витаминот во крвта за околу 50% во рок од два до три месеци. Слично на тоа, истражување од 2014 година на 50 постари лица откри дека внесувањето витамин Д со оброк богат со масти го зголемува нивото во крвта за 32% во рок од само 12 часа, во споредба со оброк без масти.
За подобра апсорпција во исхраната вклучете извори на здрави масти како авокадо, јаткасти плодови, семки, масна риба (лосос, сардини), полномасни млечни производи и јајца.
Зошто многумина го земаат наутро?
Многу луѓе го земаат витаминот Д наутро поради практичност — полесно е да се создаде навика, особено ако се земаат повеќе додатоци. Себеси можете да си помогнете со кутија за апчиња, аларм на телефон или држење на суплементите на видно место, на пример на трпезарската маса.
Дали земањето навечер влијае на сонот?
Некои луѓе преферираат да го земаат навечер, но прашањето е дали тоа може да го наруши сонот. Доказите се мешани. Дел од студиите укажуваат дека витаминот Д влијае на производството на мелатонин, па земањето пред спиење можеби би можело да го наруши ноќниот ритам.
Сепак, понови истражувања, вклучително и анализа од 2024 година, покажуваат дека суплементацијата со витамин Д може да го подобри квалитетот на спиењето кај одредени групи. Реакцијата е индивидуална, па затоа е најдобро секој сам да го утврди времето кое најдобро му одговара.
Постои ли идеално време за земање?
Иако земањето витамин Д со оброк значително ја подобрува апсорпцијата, научниците сè уште немаат дефинитивен одговор дали е подобро да се зема наутро или навечер. Најважно е да го внесувате редовно, секој ден, во исто време.
Без разлика дали го земате со појадок или вечера, доследноста е поважна од изборот на дел од денот. А доколку не сте сигурни за дозата, најдобро е да се консултирате со лекар или фармацевт.
