Откако Америка, Велика Британија и Канада се откажаа од руската нафта, купувачите се во своевиден штрајк, а цената на нафтата продолжува да расте, пишува во четвртокот Јутарњи лист.
Откако САД го забранија увозот на руска нафта, деривати, јаглен и течен природен гас и американските компании да инвестираат во рускиот енергетски сектор, а Велика Британија и Канада се откажаа од таа нафта, цената на нафтата Брент дополнително скокна, а се чека каков ќе биде енергетскиот одговор на Москва, и дали ќе има дополнителна ескалација на кризата поради санкциите поради руската агресија врз Украина.
Сепак, аналитичарите посочуваат дека Европската унија нема да ги следи Американците во овие забрани бидејќи е многу повеќе зависна од руската енергија, а да не зборуваме дека Кина и Индија, кои се најголеми увозници на руска нафта, се на маргините.
Со други зборови, потезите на САД не се дел од воведувањето на општо ембарго кон Русија, како што беше случајот со Иран во 2018 година, па Москва сè уште може да извезува на други пазари. Русија е трет по големина извозник на нафта во светот и најголем извозник на нафтени деривати, а нејзиното целосно исчезнување од светскиот пазар на нафта, се проценува дека тешко би се компензирало на краток рок. Америка, од друга страна, е најголемиот пазар на нафта во светот, кој увезува околу осум отсто од вкупните потреби од Русија, па не е толку тешко да се надомести загубата, иако американските рафинерии ќе го почувствуваат притисокот.
Меѓутоа, како тоа влијае на Русија? Иако сè уште може да извезува на други пазари, аналитичарите посочуваат дека купувачите се во еден вид штрајк, или „самосанкционирање“, бидејќи компаниите не сакаат да преземат ризик да ги преземат руските испораки на нафта, кои најмногу се однесуваат на танкери.
Се издвојува примерот на „Шел“, која минатата недела реши да купи уралска нафта од групацијата „Трафи гура“, чија цена драстично падна, па тие беа изложени на големи критики во јавноста за овој потег. Украинскиот министер за надворешни работи Дмитро Кулеба, на пример, на Твитер го прашал Шел дали руската нафта мириса на украинска крв, јавуваат светските медиуми.
Доколку продолжи оваа самосанкција, велат експертите, тоа би можело да има домино ефект врз руските рафинерии и да ги принуди тамошните производители на нафта да го забават или целосно да го запрат производството.
