Цените на храната се приближија до највисокото ниво за две години во јуни, бидејќи порастот на цените на месото и растителното масло ги надминаа значително поевтините шеќери и житарки, покажа извештајот на Агенцијата за храна и земјоделство на ОН (ФАО) објавен во петокот.
Индексот на цените на прехранбената кошничка на ФАО изнесуваше 128,0 поени во јуни, што е зголемување од 0,5 проценти во однос на мај. Со тоа, нејзината вредност се приближи до највисокото ниво за две години, од 128,2 поени, кое го достигна во април. Во споредба со јуни минатата година, цените се повисоки за 5,8 проценти.
Растителните масла најмногу поскапеа во мај, за 2,3 проценти, а повисоките цени се однесуваа на палминото масло, маслото од репка и соиното масло поради зголемената побарувачка во секторот за биогорива. Цените на сончогледовото масло малку се намалија поради зголеменото производство во регионот на Црното Море.
Цените на месото, исто така, значително се зголемија, за 2,1 процент, достигнувајќи нов максимум откако ФАО почна да објавува податоци, бидејќи силните зголемувања на цените на говедското, свинското и овчо месо повторно го надминаа падот на цените на живината.
Цените на млечните производи се зголемија за 0,5 проценти во јуни, бидејќи ограничените залихи во Океанија и ЕУ и континуираната висока побарувачка во Азија ги турнаа цените на путерот на највисоко ниво откако ФАО почна да објавува податоци втор месец по ред.
Шеќерот, од друга страна, значително падна во јуни, четврти месец по ред, за 5,2 проценти во споредба со мај, при што цените паднаа на најниско ниво од април 2021 година, под влијание на очекувањата дека жетвата на шеќерна трска во Бразил, Индија и Тајланд, водечките производители, ќе биде исклучително добра со оглед на поволните временски услови и поголемите засеани површини.
Цените на житото, исто така, значително се намалија во шестиот месец од оваа година, за 1,5 проценти на месечно ниво, што одразува нагло намалување на цените на пченката, втор месец по ред, поради изобилството на залихи од Аргентина и Бразил. Од друга страна, цената на пченицата се зголеми поради стравувањата дека сушата би можела да ги загрози земјоделските култури во Русија, САД и одредени делови од ЕУ.
Уште кон средината на јуни, пред топлотниот бран, ФАО предвиде дека поради поволните временски услови, производството на пченица во ЕУ ќе се зголеми за 13 проценти оваа година.
Во посебен извештај за понудата и побарувачката на житни култури, ФАО малку ја зголеми својата проценка за глобалното производство на житни култури оваа година на 2,925 милијарди тони, што е нов максимум откако почна да објавува податоци.
Ова би значело зголемување од 2,3 проценти во споредба со минатата година.
Иако целокупната перспектива за пченицата, пченката и оризот се подобри, агенцијата забележува дека прогнозите за топлото и суво време во некои клучни региони би можеле да влијаат на производството, особено на пченката.
Се очекува светската потрошувачка на жито да достигне врв во сезоната 2025/2026, зголемување за 0,8 проценти, на 2,898 милијарди тони, проценува ФАО.
Залихите на жито треба да бидат за 2,2 проценти повисоки на крајот од тековната сезона, во јули следната година, отколку на нејзиниот почеток, изнесувајќи 889,1 милиони тони, според проценките на агенцијата.
Се очекува светската трговија со житни култури да се зголеми за 1,2 проценти во новата сезона, на 486,9 милиони тони, со зголемен извоз на пченица и ориз и мало намалување на обемот на трговијата со пченка, предвидува ФАО.
