Авиокомпаниите и транспортниот сектор во Европа очекуваат уште едно изгубено лето и предизвиците од бавната кампања за вакцинација, растечкиот број на заразени и новите блокади, пишува „Reuters“.
Акциите на авиокомпаниите и на транспортниот сектор воопшто забележаа нов пад кон крајот на минатата недела откако Франција и Италија повторно ги засилија ограничувањата поради коронавирусот. Ова ги доведува во прашање изгледите за закрепнување пред почетокот на летната сезона. Зимата е тешко време за транспортниот сектор, дури и без пандемија.
„Ако нема доверба, побарувачката едноставно нема да биде вратена“, велат за „Reuters“ од консултантската фирма „Alton Aviation“ со седиште во Даблин. Експертите очекуваат лоши вести во врска со кампањата за вакцинација во Европа, што ќе влијае на веќе слабите резервации.
Перспективите за летото се доведени во прашање и поради зголемениот број на заразени во Грција и другите туристички дестинации. Наспроти ова, многу земји се загрижени и ја одложуваат вакцинацијата со „AstraZeneca“ поради здравствени проблеми, иако Европската агенција за лекови (ЕМА) соопшти дека придобивките од вакцината ги надминуваат ризиците.
Меѓународната асоцијација за воздушен транспорт (IAТА) предупредува на зголемениот ризик од банкрот на авиокомпаниите до крајот на годината.
Во многу земји, сообраќајот меѓу регионите ќе остане ограничен до летото. Пример е Ирска, каде здравствените власти ја наведоа ситуацијата со коронавирусот во светот како причина за оваа одлука, како и опасноста од појава на нови варијанти на вирусот.
Авиокомпаниите се соочуваат со милијарди долгови, а некои можеби нема да преживеат без нови средства. Некои од нив започнаа да ги бараат – сопственикот на „British Airways“, „IAG“, издаде нов долг од 1,2 милијарди евра. „Air France KLM“ планира и операција за собирање капитал и намалување на загубите од минатата година.
Авиокомпанијата планира да лета со околу 50% од својот капацитет пред кризата. Друг водечки играч во секторот, „Lufthansa“, ќе користи 40-50% од својот капацитет оваа година од пред појавата на вирусот. Но, дури и овие планови можат да бидат амбициозни.
Сепак, нискобуџетните авиокомпании можат полесно да ја преживеат кризата, велат аналитичарите. Компаниите како „Ryanair“ и „Wizz Air“ се пофлексибилни во пренасочувањето на своите авиони помеѓу дестинациите.
Наспроти ова, авиокомпаниите преку океанот пријавуваат растечки резервации за пролет и лето. Кампањата за вакцинација во САД е успешна, а ограничувањата во земјата се ублажуваат. Слична е состојбата и во Велика Британија.
Експертите предвидуваат дека патувањата меѓу Соединетите држави и Велика Британија може да се охрабрат во оваа ситуација – контрапункт на тезата дека патувањето до кратки дестинации прво ќе закрепне.
