Научниците идентификуваа антивирусен протеин кој открива размножување на вирусот во клетките и кој го контролира имунолошкиот одговор на вирусот SARS-CoV-2.
Протеинскиот сензор во човековите бели дробови е идентифициран како оној кој го открива вирусот SARS-CoV-2 и испраќа сигнал до имунитетниот систем дека е време за антивирусен одговор. Откритието е направено од научници од Институтот за медицинско откривање на Санфорд Бурнхам Пребис во Калифорнија.
Студија за откритието е објавена во научното списание Cell Reports, а таа студија дава увид во молекуларната основа на тешка форма на болеста и може да доведе до нови стратегии во третманот и превенцијата од Ковид-19.
“Нашето истражување покажа дека протеинот МДА-5 е имунолошки полицаец кој има за задача да внимава на вирусот SARS-CoV-2 и да повика на засилување кога е време да го стори тоа”, вели Сумит Чандра, директор на програмата за имунитет и патогенеза на наведениот институт и еден од авторите на студијата.
МДА-5 препознава вируси кои се размножуваат во белодробните клетки и го активира интерферонот, главниот заштитник на нашето тело во прва борбена линија во борбата против вирусната инвазија. Без соодветна реакција на соодветниот интерферон, вирусните инфекции можат да доведат до смртоносни воспалителни реакции кои излегуваат од контрола, додава Чандра.
Во студијата, истражувачите проучувале 16 вирусни протеини кои се врзуваат за РНК во човечките епителни бели дробови и го идентификувале МДА-5 како најдоминантен сензор одговорен за активирање на интерферонот. МДА-5 открива двојна низа на вирусна РНК, форма што ја добива новиот коронавирус кога се размножува за да се прошири инфекцијата.
Пред оваа студија, беше познато дека активирањето на интерферонот е клучно за да се координира имунолошкиот одговор врз вирусот, но чуварот што го контролира процесот досега беше непознат за научниците.
“Разбирањето на биологијата на вирусот и начинот на откривање е од најголема важност за контрола на инфекцијата и спречување на ширењето на болеста. Вирусот SARS-CoV-2 се чини дека го оневозможува работењето на природниот имунитет во системот за надзор на човечкото тело, кој, во случај на вирус SARS-CoV-2, го контролира МДА-5, со што се спречува активирање на интерферонот. Реакцијата на интерферонот е таа која подоцна доведува до активирање на многу гени кои започнуваат антивирусна активност, а податоците сугерираат дека оваа активност ни е потребна за да ги контролираме раните фази на вирусна инфекција и да ги избегнеме најлошите резултати на Ковид-19”, вели Чандра.
Тој додава дека способноста на организмот да ја совлада офанзивната тактика на вирусот и да го активира интерферонот во голема мера влијае на тоа колку тешка форма на болест ќе биде. Претходните студии покажаа дека активирањето на интерферон е повисоко кај пациенти со лесни до умерени симптоми отколку кај критично болни пациенти.
“Можно е критично болните пациенти да имаат недостаток во испраќање сигнали до интерфероните. Ова истражување отвора нови пристапи во третманот кои ја зголемуваат јачината на сигналот МДА-5 до интерфероните со цел да се активираат повеќе во раните фази на болеста и да ја спречат нејзината тешка форма”, истакна Чандра на крајот.
Коментари