Нафтените компании во Европа беа под притисок на владите и инвеститорите да ги намалат емисиите, а многумина почнаа да го свртуваат вниманието кон обновливите извори, објави „Reuters“.
Но, тие имаат и друг ас во ракавот – добро развиени ланци на бензински пумпи. Гиганти како „BP“, „Shell“ и „Total“ веќе соопштија дека очекуваат поголем приход од продажбата во продавниците до нивните бензински пумпи, што ќе продолжи да биде место за возачите, дури и на електричните автомобили.
Потребни се само неколку минути за да го наполните резервоарот на автомобилот со бензин или дизел. Сепак, полнењето на електрични автомобили, дури и со брзи станици, трае најмалку 10-15 минути. Што прават возачите во ова време? Многу едноставно – пијат кафе и купуваат.
Затоа, не е ни чудо што компаниите одлучија да го свртат своето внимание кон бензинските пумпи – „Shell“ планира да го зголеми својот ланец продавници до бензинските пумпи за 20% до 55.000 ширум светот до 2030-та година. „ВР“ планира да ги прошири бензинските пумпи за 50% до 29.000 до 2030-та година и да ги подигне местата на полнење на електричните автомобили на 70.000.
„Total“ е насочена и кон станиците за полнење – во моментот компанијата има 18.000 места во Европа и планира да ги зголеми на 150.000 до 2025-та година.
Нивните шанси не се мали – реално, двата најголеми ланци за брза храна во светот, „Subway“ и „McDonald’s“, имаат помалку ресторани земени заедно од „Shell“. Компанијата исто така забележа рекордни приходи од продажба во продавниците до своите бензински пумпи во третиот квартал од годината – 1,6 милијарди долари, покажуваат податоците на „Reuters“.
„Shell“ додава дека секојдневно ги следат навиките на своите потрошувачи – од тип на гориво до кроасан за кафе и можат брзо да одговорат на побарувачката.
„ВР“ и „Total“ исто така забележаа раст на продажбата во нивните продавници за време на пандемиските месеци. Набљудувањата на „ВР“ се дека за време на блокадата, луѓето купуваат преку Интернет и во малите маалски продавници, вклучително и оние на бензинските пумпи.
Бензинските пумпи обично соработуваат со добро познати ланци – за храна или малопродажба, што исто така може да ги претвори во неочекуван конкурент за супермаркетите.
Новите планови за декарбонизација на европската економија, како пандемијата, јасно го ставаат прашањето повторно на маса.
Коментари