Претседателката на Европската централна банка Кристин Лагард рече дека ЕЦБ најверојатно во иднина почесто ќе ја пропушта целта за инфлацијата од два проценти бидејќи креаторите на политиката се принудени да се справуваат со „екстремно високата“ неизвесност.
Една недела откако централната банка сигнализираше можно забавување на падот на трошоците за задолжување, намалувајќи ја референтната каматна стапка за четвртина поен на 2,5 отсто по шести пат, Лагард предупреди дека опкружувањето станало толку барано што би било „невозможно“ да се гарантира дека „главната инфлација секогаш ќе биде на два проценти“.
Лагард рече дека целта на ЕЦБ е да обезбеди „инфлацијата секогаш да се движи назад кон два проценти на среден рок“. Таа, исто така, истакна дека поголемото јавно задолжување за финансирање на одбраната и инфраструктурата, како и потенцијалната трговска војна во која се вклучени САД, „може подиректно да влијае на инфлацијата и да ја зголеми нестабилноста“.
Еврозоната би можела да биде особено ранлива бидејќи сме силно изложени на некои од новите видови шокови поради нашата голема зависност од глобалната трговија и увозот на енергија – предупреди таа, додавајќи дека поголемите шокови може да донесат ризик инфлацијата да стане по ‘леплива’.
Ескалацијата на царините, како и големата цел за зголемување на трошоците за одбраната и инфраструктурата, што ги бара Германија, би можеле да создадат „нови двојни шокови“ кои би можеле да ја забават или забрзаат инфлацијата, рече претседателката на ЕЦБ, заклучувајќи дека сега е многу потешко да се предвиди насоката на шоковите.
Многу неуспеси од страна на ЕЦБ
Иако шефицата на ЕЦБ сега истакнува дека геополитичките тензии ја направија ситуацијата непредвидлива, ЕЦБ историски не се истакна во носењето точни одлуки.
На пример, ЕЦБ го потцени растот на инфлацијата во минатото, особено по пандемијата СОВИД-19 и војната во Украина. Во 2021 година, тие предвидуваа привремен пораст на инфлацијата, додека тоа стана долгорочен проблем, што доведе до агресивни зголемувања на каматните стапки во 2022 и 2023 година.
Исто така, за време на европската должничка криза, ЕЦБ извесно време одржуваше високи каматни стапки, што ја продлабочи рецесијата во некои земји од еврозоната. Дури подоцна ја прилагодија политиката и воведоа неконвенционални мерки како негативни каматни стапки и квантитативно олеснување. И иако нивните упатства може да бидат корисни, историјата покажува дека тие често погрешиле. Тие често беа преоптимисти за инфлацијата и брзината на економското закрепнување, а понекогаш и премногу бавно реагираа на промените.
