Во време на економска неизвесност и инфлациски удари, темата за минималната плата повторно е во фокусот на јавноста.
Синдикатите тврдат дека животниот стандард на работниците е драстично намален и бараат покачување на минималната плата на 500 евра.
Но, дали ова е доволно, и дали Македонија во блиска иднина може да види минималец од 30.000 денари?
Синдикатите бараат покачување, работодавачите воздржани
Синдикатите тврдат дека моменталниот износ на минималната плата не е доволен за да ги покрие основните трошоци на едно просечно семејство.
„Ако во 2022 година една просечна потрошувачка кошничка изнесуваше околу 35.000 денари, денес тој износ е далеку повисок.
Работниците живеат сè потешко, и токму затоа бараме минималната плата да биде најмалку 500 евра“, апелираат синдикалците.
Работодавачите, пак, сметаат дека постојаните зголемувања на минималецот носат финансиски притисок врз компаниите, особено врз малите и средни претпријатија.
Владата во улога на посредник
Владата засега останува неутрална, повторувајќи дека ќе прифати сè што ќе договорат синдикатите и работодавачите.
Премиерот Христијан Мицкоски го повтори ставот на Владата дека ќе биде поддржан секој износ на минимална плата кој ќе го договорат работодавачите и синдикатите.
Ако нема договор, посочи тој, тогаш ќе важи законски пресметаниот износ на минимална плата.
„Минималецот може да се донесе и во март, бидејќи се исплаќа во почетокот на април. Ако се заврши со договор меѓу работодавачите и синдикатот, нема никаква дилема – изјави премиерот Христијан Мицкоски.
Реално ли е минималец од 30.000 денари?
Според економистите, ваков износ е остварлив, но не во краток рок.
Економските аналитичари сметаат дека минималната плата може да достигне 30.000 денари во следните три до пет години, но само доколку има стабилен економски раст и продуктивноста на трудот се зголеми.
„Ако продуктивноста не расте, а платите се зголемуваат по административна одлука, тоа ќе значи инфлација и намалување на куповната моќ. Затоа е неопходно зголемување на инвестициите, дигитализација на економијата и реформи на пазарот на труд“, анализираат експертите.
Што значи ова за работниците?
За работниците, секое покачување на минималната плата е чекор напред, но многумина се прашуваат дали тоа е доволно за подобрување на квалитетот на животот.
Љубица Додевска, вработена во текстилната индустрија, вели дека и со 25.000 денари едвај се врзуваат краевите.
„Сметките за струја, храна, кирија – сè е поскапо. Како да живее едно семејство со сегашната минимална плата? Ако дојде до 30.000 денари, тоа би значело барем малку достоинствен живот“, вели Додевска.
Зголемувањето на минималната плата на 30.000 денари е амбициозна цел која бара внимателно планирање и економски раст.
Додека синдикатите инсистираат на брзо покачување, работодавачите предупредуваат на ризици, а Владата останува посредник во преговорите.
Дали Македонија ќе види минималец од 30.000 денари во блиска иднина, ќе зависи од развојот на економијата и односите меѓу социјалните партнери.
Б.З.М.
