Министрите за европски прашања на земјите-членки на ЕУ денеска на седницата на Советот за општи работи на ЕУ посветена на приоритетите на унгарското претседателство, го поддржаа процесот на проширување на ЕУ заснован на заслуги, вклучително и за Западен Балкан.
Унгарскиот министер за европски прашања Јанош Бока на седницата, на која ги презентираше приоритетите на унгарското претседателство, меѓу кои е и доследна политика на проширување заснована на заслуги, рече дека проширувањето е една од најуспешните политики на ЕУ.
„Треба да го одржиме овој успех за да се осигураме дека (проширувањето) е засновано на заслуги, избалансирано и веродостојно. Ги погледнавме земјите од Западен Балкан и изгледите за членство во ЕУ во овој поглед. Без ова, европската заедница не може да биде комплетна“, рече тој.
Европскиот комесар за правда Дидие Рејндерс изјави дека за неколку недели Европската комисија ќе го претстави пакетот за проширување, кој ќе вклучува детална проценка за состојбата на напредокот во земјите кандидати и ќе даде јасни насоки за реформите.
Тој додаде дека процесот на проширување се заснова на заслуги и така ќе остане и оцени дека ЕУ е внатрешно подготвена за проширување.
„Потребна е амбициозна реформска агенда за да се обезбеди правилно функционирање на поголемата ЕУ“, рече Рејндерс.
По него говореа претставниците на земјите-членки на ЕУ, а претставникот на Чешка рече дека нејзината земја цени дека проширувањето е еден од приоритетите на унгарското претседателство и изрази надеж дека моментумот што постои кога станува збор за политиката за проширување ќе се задржи, но дека нема да се ограничи само на Западен Балкан, туку ќе важи и за земјите кандидати на исток.
И Словачка го поддржува проширувањето како приоритет, рече претставникот на таа земја и додаде дека се надева оти Западен Балкан ќе напредува во тој процес „добро и лесно“.
„Проширувањето на ЕУ мора да се одвива на балансиран начин. Истите правила мора да се применуваат за сите земји кандидати од Западен Балкан, како и на исток“, рече тој.
И претставникот на Франција го поддржа процесот на проширување, но не, како што рече, само на Западен Балкан, туку и на другите партнери од ЕУ, како Молдавија и Украина, додека претставникот на Финска оцени дека проширувањето и владеењето на правото се клучни прашања во агендата на таа земја.
„Иднината на Украина, Молдавија, Грузија и Западен Балкан е во ЕУ“, рече претставникот на Финска, но оцени дека Украина во голема мера недостасува од приоритетите на унгарското претседателство со ЕУ.
За претставничката на Португалија, процесот на проширување е геополитички и економски интерес и, напомена, треба да се заснова на заслуги.
„Многу сме среќни што веќе започнавме преговори со некои земји и се надеваме дека процесот ќе остане заснован на заслуги“, рече таа, истакнувајќи дека проширувањето бара и внатрешни реформи.
Приоритетите на унгарското претседателство со Советот на ЕУ, особено фокусот на проширување на конкурентноста, кохезијата и одбраната, се поддржани и од Полска.
„Во однос на проширувањето, се надеваме на еднакво силна посветеност за поттикнување на интеграцијата на Украина и Молдавија, како и на земјите од Западен Балкан“, рече претставникот на Полска.
Претставничката на Хрватска истакна дека нејзината земја посветува посебно внимание на процесот на проширување, со акцент на Западен Балкан, но и Украина и Молдавија, како и дека Хрватска го поддржува амбициозниот пристап на унгарското претседателство во однос на одржувањето на првата меѓувладина конференција со Босна и Херцеговина.
Претставникот на Шпанија рече дека неговата земја ги цени приоритетите на унгарското претседателство, од кои прв е конкурентноста, а кога станува збор за проширувањето, истакна дека тоа претставува геостратешка инвестиција во идниот просперитет на ЕУ.
Претставникот на Словенија изрази задоволство што проширувањето е еден од приоритетите на унгарското претседателство со Советот на ЕУ и што фокусот ќе биде ставен на Западен Балкан, како и што Унгарија планира да го организира самитот на ЕУ и Западен Балкан.
Сите земји кандидати во процесот на проширување, како во Западен Балкан, така и во Источна Европа, се поддржани од Италија, рече нејзиниот претставник.
„Сите овие земји спроведуваат сложени реформи и ние мора целосно да ги искористиме инструментите на Европската унија за да го поддржиме и подобриме тој процес. Мора да бидеме подготвени да ја препознаеме нивната посветеност кога ќе постигнат значителен напредок“, рече тој.
За претставникот на Кипар, важно е проширувањето да биде процес заснован на заслуги и дека фокусот е на владеењето на правото.
Иако министрите на денешната средба ја поздравија програмата и приоритетите на унгарското претседавање со ЕУ, голем дел од нив изразија незадоволство што поддршката за Украина не е еден од приоритетите, а дел од нив зборуваа и за конфликтот на Блискиот Исток во овој контекст.
Покрај конзистентната политика за проширување заснована на заслуги, други приоритети на унгарското претседателство, за кои исто така беше разговарано денеска, се однесуваат на новиот европски договор за конкурентност, зајакнување на европската одбранбена политика, спречување на илегалната миграција, обликување на иднината на кохезионата политика на ЕУ, земјоделската политика на ЕУ ориентирана кон земјоделците и решавање на демографските предизвици.
