Со просечна плата повисока од 1.500 евра програмерите се „заковани“ на врвот на листата најплатени професии во Македонија, а освен тоа што се најплатени, тие се и најбарани, па затоа не треба да нè чуди податокот дека дури и да не постои невработен програмер во земјава.
Денар разговараше со 32-годишниот Горан Симоновски од Скопје, кој со оваа професија се занимава веќе цела деценија, а неговите месечни примања, како што ни откри самиот тој, честопати надминуваат 3.000 евра.
-Работам за странска компанија која се занимава со развој на веб апликации. Користам различни програмски јазици и технологии, како што се HTML, CSS, JavaScript, React и други. Работам од дома и имам флексибилно работно време, иако најчесто работам ноќе поради разликата во временските зони. Можам да кажам дека не беше лесно да стигнам до плата од 3.000 евра месечно, но тој сон ми се оствари и сум многу задоволен. Заработувам скоро двојно повеќе од просечната плата на програмерите во Македонија. Среќен сум со тоа што го работам и сакам да учам нови работи и да се усовршувам во својата област – ни изјави Симоновски.
На прашањето што е потребно за да станете успешен програмер и да заработувате големи пари, тој ни одговори дека најпотребно е да имате желба, мотивација, посветеност за учење и вежбање програмски јазици и технологии.
Според него, не постои едноставна формула или краток пат за да станете успешен програмер, туку треба да инвестирате време и напор во развивање на вашите вештини и знаења.
Го замоливме нашиот соговорник да напише листа со совети до младите од Македонија кои имаат афинитети и желба да инвестираат во себеси за во иднина да станат успешни програмери.
-Прво, одберете еден или повеќе програмски јазици кои сакате да ги научите. Постојат многу различни програмски јазици како што се Java, Python, JavaScript, Ruby и други. Секој од нив има свои предности и недостатоци, како и различни примени. Нема правилен или погрешен избор на јазик, туку зависи од вашите интереси и цели. Второ, научете ги основните концепти и принципи на програмирањето, бидејќи тоа не е само пишување кодови, туку и решавање на проблеми, дизајнирање на алгоритми, тестирање и дебагирање на кодови, документирање и оптимизација на перформансите. Затоа, треба да се запознаете со основните концепти на програмирањето како што се променливи, типови на податоци, оператори, контролни структури, функции, објекти, класи, наследување, полиморфизми – советува Симоновски.
Нема подобар начин за да се научи програмирање од тоа да се практикува кодот и да се работи на проекти, додава тој.
-Вежбајте редовно со решавање на задачи од различни нивоа. Работете на проекти кои вас ве интересираат или кои можат да ви помогнат во вашата кариера. Пребарувајте по Интернет за инспирација или користете платформи за да гледате и учествувате во постоечки проекти. Користете ресурси за учење и за помош. Програмерите не смеат да бидат изолирани, туку треба да користат различни ресурси како што се онлајн курсеви, видеа, туторијали, блогови, форуми, поткасти. Тие можат да ви помогнат да го проширите вашето знаење, да гледате различни перспективи и пристапи, да добивате совети и трикови од експерти и да решавате проблеми. И уште една многу важна работа – бидете критични и креативни. Програмерите не треба да го прифаќаат кодот како дадена задача и да го копираат без размислување. Треба да бидат критични и креативни во својот работен процес. Треба да го анализираат кодот, да го проверат за грешки и недостатоци, да го подобрат и да го рефакторираат, да го тестираат и валидираат, да го документираат и да го коментираат. Треба да експериментираат со различни идеи и решенија, да ги следат најдобрите практики и стандарди, да го користат својот стил и личност во кодот – посочува Симоновски.
Б.З.М.
