Азија, еден од најголемите потрошувачи на енергија во светот, беше среќна што забележа топол прием од гасните компании на египетскиот еколошки форум „COP27“, напиша во анализа колумнистот на „Reuters“, Гевин Мегваер.
Тој, исто така, потсетува дека во претходните изданија на иницијативата на ОН, секторот за гас беше наведен како еден од изворите на емисиите на јаглерод и дел од проблемот со климатските промени.
Меѓутоа, денес природниот гас е фаворизиран како преодно гориво – неговото согорување испушта околу 40-50% помалку емисии од јагленот кога се произведува мегават-час електрична енергија.
Се чини дека природниот гас може да биде корисен за транзицијата кон зелена економија во два од помалку економски развиените региони во светот – Азија и Африка. Азиските економии се „гладни“ за енергија, која моментално се снабдува главно од јаглен, а Африка има наоѓалишта на природен гас што националните влади немаат намера да ги остават неразвиени.
57% од електричната енергија во азиските земји се произведува од јаглен, покажуваат податоците на „ВР“. Ова значи дека префрлањето на природен гас потенцијално може значително да ги намали емисиите на јаглерод без да се направат никакви драстични промени во енергетскиот систем. Вообичаено, промената доаѓа со поставување на гасни турбини и замена на некоја друга опрема во постоечките електрани. Во голема мера е зачуван производствениот капацитет и се користи постоечката енергетска инфраструктура.
Од друга страна, изградбата на зелена енергија обично бара проширување на мрежата, покрај други активности, вклучително и изнаоѓање слободно земјиште за поставување на соларни панели или турбини на ветер.
Преминот од јаглен на гас има и дополнителни предизвици – како што е обезбедување стабилно снабдување со природен гас и проширување на гасоводот на континентот. Во моментов, мрежата на гасоводи во Азија е многу лабава, во споредба со Европа на пример, со главните цевководи лоцирани во Кина и Индија.
Но, анализите покажуваат дека се работи на ова прашање во Азија – во февруари 2022-ра година во светот се градат 70.000 километри гасоводи, од кои над 45.000 километри се во азиските земји. Кина, на пример, планира да инвестира 100 милијарди долари во објекти за кои ќе бидат потребни години за да се изградат.
Војната во Украина, која започна во февруари, ја смени гасната карта на светот. Цената на природниот гас значително скокна, а тоа донекаде ја олади желбата на Азија да се префрли на природен гас. Во Индија и Кина, сепак, тие не ги напуштаат своите планови за гасификација, забележува и Мегваер. Овие две земји сочинуваат 48% од потрошувачката на гас во Азија.
Војната во Украина создаде уште еден проблем за Азија – потенцијалните добавувачи од Африка сега се посакуван извор на природен гас во Европа. Тие треба да ја заменат суровината што до неодамна земјите ја добиваа од Русија. Но и тоа не е толку сериозен проблем, Русија може да ги пренасочи тековите кон Азија. Проблемот е инфраструктурата што недостасува, а изградбата може да трае со години.
