Руските банки изгубија вкупно 1,5 трилиони рубљи (24,95 милијарди долари) во првите шест месеци од 2022-ра година, изјави висок функционер на руската централна банка во интервју за бизнис веб-страницата РБК во петокот.
Регулаторот објавува податоци за финансиските перформанси на банкарскиот сектор за прв пат откако Русија испрати војници во Украина во февруари.
Ова е прва загуба за рускиот банкарски сектор во последните седум години.
Од 1-ви јули, во Русија работат 329 кредитни институции. Според резултатите за првата половина од годината, три четвртини од оперативните банки пријавиле добивка, а четвртина биле во загуба, вели Дмитриј Тулин, прв заменик-претседател на Централната банка на Русија.
„Загубите се концентрирани кај најголемите банки. Институциите кои губат забележаа вкупна загуба од 1,9 трилиони рубљи, а профитабилните доверители имаат вкупен профит од 400 милијарди рубљи – појаснува тој.
Тулин објаснува дека малите и средните банки биле помалку погодени не само затоа што не биле погодени од санкциите, туку и затоа што помалку биле вклучени во сервисирањето на надворешните економски односи и имале помалку операции на меѓународните финансиски пазари.
Околу две третини од загубите на банките се поврзани со работењето во странска валута.
Според регулаторот, помалку од половина од 13 системски важни банки (40%) не пријавиле нето добивка во првата половина од годината, а нивните загуби ги надминале позитивните резултати на останатите.
„Може да се каже дека досега банкарскиот сектор се извлекуваше со „малку крв““, коментира Тулин. Тој потсетува дека во 2021-ва година секторот забележа рекорден нето профит од 2,4 трилиони рубљи, а капиталните резерви на банките на 1-ви јануари изнесувале 7 трилиони рубљи.
„Некако поедноставено, можеме да кажеме дека како резултат на загубите што ги претрпеа банките, беше искористен помал дел од овие резерви. Ова не е најскапата цена за надминување на последиците од силниот удар што санкциите му го нанесоа на нашиот банкарски систем“, резимира првиот потпретседател на централната банка.
Тој не даде прогноза за финансискиот резултат на секторот на крајот на годината, но истакна дека веројатноста за задржување или намалување на веќе пријавената загуба е „над 50 отсто“.
Централната банка не очекува повторување на банкарската криза од 2014-2017 година, кога регулаторот мораше да спаси неколку заемодавачи и да ги одземе банкарските лиценци на стотици тенко капитализирани банки, додаде Тулин.
