Во издание на Стрип центарот на Македонија со седиште во Велес се отпечатени книги во тврд повез наменети за македонскиот пазар, но и пазарот на соседни држави.
Издадени се „Итар Пејо 2 книга“ од Диме Иванов Димано, „Цар Гаврило Радомир“ од Миле Топуз, детскиот стрип „Убавите нешта“ од Раде Дичоски, како и „Зад црното сонце“ на српскиот автор Срѓан Николиќ-Пека. Во стрипот за царот Гаврило Радомир сместени се и стриповите за Ѓорги Војтех, Добромир Хрс и Стрез, господарот на Просек.
„Издадовме историска приказна, детска приказна, трилер и стрип со тема од македонската традиција. Минатата година, за прв пат во Македонија, издадовме стрип-книга на албански јазик, Годинава продолжуваме со издавање на стрип книга на српски јазик на Срѓан Николиќ-Пека, голем пријател на македонската стрип сцена и победник на последниот интернационален стрип натпревар во склоп на интернационалниот стрип салон во Велес“ изјави Ване Трајков, извршен директор на Стрип центарот на Македонија.
Дизајнот е на штипјанецот Александар Стеванов, кој ги изработи на високо професионално и естетско ниво. Овие четири стрип-книги можат да се набават кај издавачот и во стрип-книжарницата „Бункер“ во Скопје.
