Ретроспективна изложба од 20 дела од Вељо Ташовски, беше отворена во петок вечер во македонскиот Културно-информативен Центар во Софија.
Изложбата е реализирана во соработка со Националната галерија на Македонија и истата минатата година беше поставена во Даут Пашин Амам во Скопје, во Битола, Велес и Штип.
На вечерашново отворање пред присутните гости и семејството на сликарот Ташовски, се обратија директорот на македонскиот Центар во Софија, Васко Шутаров, кустосот на изложбата Маја Неделковска-Брзанова и Конча Пиркоска, ликовен критичар.
Вељо Ташовски е роден во 1949 год. во с.Осој, Р.Македонија. Дипломирал на Академијата за ликовни уметности во Љубљана во 1975 година во класата на проф.Габриел Ступица, а на истата Академија и магистрира во 1979 год.
Од 1984 година се вклучува активно во ликовниот живот во Македонија, а реализирал и неколку студиски престои во бројни европски земји и САД. Во 1987 година, се вработува на Факултетот за ликовни уметности во Скопје, а во периодот од 2002-2006 година бил декан на истиот факултет.
Реализирал бројни самостојни и групни изложби, добитник на бројни државни награди во Р.Македонија, Словенија, Хрватска, Србија.
Изложбата на Вељо Ташовски во Софија е финансиски поддржана од Министерството за култура на Р. Македонија.