Денес практично никој, па дури ни самиот „татко“ на социјалните мрежи – Марк Цукерберг не може со сигурност да предвиди во кој правец ќе се развиваат социјалните мрежи во следните пет, а камоли во следните 50 години. Она што со сигурност и без сомневање може да се каже е дека социјалните мрежи суштински ги променија условите и правилата на игра според кои денешните банки работат.
Досегашните трендови во развојот на социјалните мрежи и модерните решенија кои банките веќе денес ги применуваат со цел максимално да го искористат потенцијалот на социјалните мрежи за развој на работењето нудат увид во неколку модели на работење во иднина кои засекогаш ќе го промени банкарството.
Веќе сега станува сосема очигледно дека социјалните мрежи полека ќе ја укинат потребата за маркетингот кој денес го познаваме, односно билбордите, телевизиските реклами и сл. Денес веќе имаме одреден број на банки, мал но во постојан пораст, кои веќе ги користат предностите на социјалните мрежи со цел на клиентите да им ги понудат своите услуги по цени кои се драстично пониски од цените на класичната рекламна кампања.
Продолжувањето на ваквата пракса и равојот на социјалните мрежи ќе им овозможи на банките да им пристапат на одделни клиенти со пакет производи посебно прилагодени на нивните потреби со посебни камати чија висина ќе зависи, на пример од вредноста на тој клиент за банката. Пристапот „една понуда за сите“ полека ќе исчезе а банкарските услуги ќе станат целосно прилагодени профили за индивидуалните корисници.
Крај на телефонските повици
Уште една работа која можеме да ја потврдиме со сигурност е дека зголемената проактивност на банките на социјалните мрежи полека ќе ја укине потребата за класичните телефонски кориснички центри. Веќе денес постои значителен број на банки кои со големо внимание ги следат мрежите како Твитер или Фејсбук и ги координираат своите активности во согласност со информациите и мислењата на клиентите кои се наоѓаат таму.
Она што во овој сегмент на работење ќе се случи е тоа што банките ќе бидат во прилика да идентификуваат многу повеќе поплаки за своето функционирање отколку досега и ќе бидат во можност да ги отстрануваат со цел да го зголемат задоволството на своите клиенти.
На пример, честите поплаки за долгото време на чекање за услугата од шалтерскиот работник ќе и укаже на банката дека таа треба да го промени моменталниот систем. Исто така, твитот за неисправниот банкомат ќе и овозможи побрзо да ја поправи штетата.
Поплаките на корисниците ќе и бидат на располагање на банката во реално време, а банката со проактивно учество во дискусиите ќе може да влијае на зачувувањето на својата репутација.
Нова улога на мрежата на филијали
Иако мрежата на филијали каква што ја познаваме денес веројатно ќе „преживее“ уште некое време, се повеќе се покажува дека социјалните мрежи суштински ќе го променат начинот на кој тие ќе функционираат. Веќе сега станува јасно дека во не толку далечна иднина, секојдневните трансакции ќе се обавуваат преку апликации на социјалните мрежи.
Понатамошното усовршување на овие апликации ќе им овозможи на банките, во безбедно опкружување, на клиентите да им обезбедат низа на основни услуги, како што е доставата на извод за состојбата на сметката или плаќање на стока и услуги.
Филијалите ќе ги преземат за себе покомплексните трансакции, како што е одобрувањето на станбен кредит, кредити од друг вид и сл.
Со тек на време и овие услуги ќе мигрираат на социјалните мрежи, бидејќи понатамошниот развој на сервисот ќе им овозможи на банкарските службеници да бидат со клиентот во контакт, на пример, преку апликацијата за видео повик.
Шалтерски службеници или таблет компјутери
Една од последиците од промените на начинот на функционирање на филијалите ќе биде и можноста за остварување на значителни заштеди со поголемата автоматизација на трансакциите. Лицата во филијалите ќе бидат заменети со таблети или слични уреди, кои за клиентите ќе бидат достапни во секој момент. Преку нив ќе се користат сите услуги кои банките ги нудат онлајн.
На крајот на овој процес, филијалите полека ќе се „преселат“ во џебовите на корисниците, на нивните преносливи уреди, со што на банките ќе им се овозможи значително да ги намалат трошоците за одржување на мрежата на филијали и со тие пари дополнително ќе го зголемат квалитетот на своите услуги на социјалните мрежи.
Ризици од новите можности
Од друга страна е фактот дека банките поради развојот на социјалните мрежи ќе мора да се откажат од некои од сегашните извори на приходи. Основното советување во поглед на инвестициите, на пример, брзо ќе ја загуби вредноста како услуга, бидејќи корисниците тие информации ќе си ги делат меѓусебно.
Појавата „low cost “ на социјалните мрежи исто така ќе влијае врз намалувањето на цените на банкарските услуги.
Банките истовремено ќе имаат проблеми и на пазарите за кредити и задолжувања со мали вредности бидејќи се повеќе микро финансиски куќи ќе започнат да делуваат на социјалните мрежи, кои им овозможуваат не само инстант пристап до клиентите туку и прилика на клиентите да им обезбедат поволни позајмици од парите на нивните пријатели, членови на фамилијата или за нив целосно непознати лица кои на тој начин ќе го решат проблемот со зголемување на средствата кои им биле на располагање, без разлика колку се тие мали, притоа помагајќи им на другите.
Следен чекор
Сето наведено во ниту еден случај не е научна фантастика. Целиот текст е базиран на решенијата кои уште сега се применуваат на банкарските пазари во целиот свет. Она што останува да се види е како банките ќе ја искористат новата прилика со цел да ја зголемат конкурентноста на пазарот и да ги искористат алатките кои им стојат на располагање со развојот на социјалните мрежи.
