Светозар Јаневски, претседател на Управниот одбор на Винарска визба „Тиквеш“, ја доби наградата за Животно дело, додека винарницата „Тиквеш“, за Најкомпанија за 2025 година, од Дирекцијата на Европската независна агенција за избор и промоција на најуспешни бизнис-лидери и компании. Овие значајни признанија претставуваат потврда за визионерството на Светозар Јаневски, неговото лидерство и исклучителниот придонес во развојот на ВВ „Тиквеш“ и целата винска индустрија во регионот.
Признанието за животно дело уште еднаш ја истакнува улогата на Светозар Јаневски како еден од највлијателните претприемачи во регионот, препознатлив по својата стратегија за модернизација, интернационализација и градење на силни брендови кои рамноправно се натпреваруваат на светската сцена, промовирајќи го регионот како релевантна деловна дестинација. Под водство на Јаневски, „Тиквеш“ во изминатите над дваесет години доживеа длабока трансформација и се етаблира како најуспешна винарница од овој дел на Европа, која во светот успешно го презентира најдоброто од нашиот регион. Со над 800 меѓународни признанија за квалитет на своите вина, таа е најнаградувана винарница во целиот регион. Со фокус на иновациите, одржливоста и јакнењето на брендовите, компанијата бележи значителен пазарен успех на сите клучни пазари, вклучувајќи ги и САД, Кина и земјите од Западна Европа.
Овие признанија пристигнуваат во година кога „Тиквеш“ го одбележува својот голем јубилеј – 140 години од постоењето, што овие награди за Светозар Јаневски и за „Тиквеш“ ги прави уште позначајни за целиот тим на винарницата.
„Ова признание не го доживувам само како лична чест, туку како потврда за патот по кој чекори ,Тиквеш’ и како признание за трудот, страста и визијата на сите кои се дел од ова винско семејство. Да се води компанија со историја долга 140 години е и чест и обврска – да го почитуваме наследството и истовремено да покажеме дека традицијата и визијата можат да одат рака под рака – во ритамот на глобалниот пазар. ,Тиквеш’ е предводник во воведувањето иновации и стандарди во производство на грозје и вино, во примената на прецизно лозарство и користење ВИ и најбитно, првата зелена винарница на овие простори“, изјави Јаневски по повод доделувањето на наградата.
Претседателот на Управниот одбор на ВВ „Тиквеш“, Светозар Јаневски во 2015 од истото тело ја доби наградата „Најменаџер“ на годината.
Винарска визба „Тиквеш“ претставува симбол на континуитет, квалитет и иновации во македонската и во регионалната винска индустрија. Со својата водечка улога и присуство на бројни меѓународни пазари, „Тиквеш“ е вистински амбасадор на македонското вино и на самата земја. Низ својата успешна приказна, компанијата значајно придонесува за градење позитивен имиџ на Македонија како винска земја со автентична понуда и врвен квалитет.
Дирекцијата на Европската независна агенција е меѓу најреномираните и најавторитетни тела на подрачјето на Југоисточна и Средна Европа. Основана како единствена независна платформа за препознавање исклучителни резултати во менаџментот, агенцијата има строго утврдени критериуми и принципи – признанијата се доделуваат исклучиво врз основа на мерливи резултати кои компаниите и поединците ги постигнале во праксата, без можност за номинации по пат на комерцијални ангажмани, што ѝ обезбедува висок кредибилитет и меѓународно реноме. Наградите досега ги имаат добиено премиери, претседатели, светски признати менаџери и водечки компании од Европа и светот.
