Фундаментална анализа 03-07 Март 2014 година
Можеби изненадени, а можеби и не првиот работен ден во оваа недела го дочекуваме со воено-политичките превирања во Украина. Развојот на настаните не е оптимистички поготово после неофицијалниот упад на руските безбедносни сили на Крим. Ваквиот развој на настаните е крајно загрижувачки бидејки остава простор за понатамошна ескалација на настаните во Украина токму после “успешната“ револуција и фактичката промена на власта во таа земја. Рускиоте оклопни транспортери (без таблички) и руските безбедносни сили (без ознаки) де факто се присутни на кримскиот полуостров и во целост го имаат окупирано под изговор дека го заштитуваат локалното населени од “бандитите“ кои насилно ја презеле власта и не се легитимни да ја водат државата. Секако овие нови “револуционери“ кои најверојатно беа потпомогнати од западните сили да ја преземат власта не се позитивно настроени кон Русија. Со оглед дека на полуостровот Крим е стационирана руската црноморска флота а населението во поголем процент е руско и овој потег мора да признаеме дека не е нелогичен. Поготово што слична ситуација видовме и за време на превирањата во соседна Грузија кога Русија се замеша и под изговор дека мора да го заштити руското малцинство откина еден дел од северната територија на Грузија. Во секој случај, развојот на настаните е исклучително негативен и како таков почна да предизвикува реакции во целиот свет.
Западните сили се многу нервозни и почнавме да слушаме за дипломатски отповикувања, разни протести, уцени па дури и закани. Ова последново можеби е најважно за нас. Имено, Русија е под закана за воведување на економско ембарго и под закана за ограничување на слободниот проток на луѓе, роба и капитал во “слободниот“ свет. Пазарните реакции во Понеделник очекуваме да бидат големи. Всушност очекувањата се дека волатилноста под влијание на несигурноста ќе предизвика реакции насекаде. Па доколку безбедносната состојба ескалира прво најверојатно ќе биде предизвикана таканаречена “risk off“ состојба на пазарите, поготово во првите два-три дена од работната недела. Тоа е состојба кога движењето на пазарите е предизвикано од страв, песимизам и несигурност. Во такви околности логично е прво негативна реакција на земјите кои се дирекно или непосредно инволвирани а позитивно е за прибежиштата на капиталот. Значи супер негативно е за руската рубља, негативно е и за сите валути на земјите кои се во непосредна близина на проблемот Полска, Турција, Романија итн. Негативно е секако за еврото кое најверојатно ќе ослабне во однос на другите валути, негативно е и за берзите (посебно во Европа) каде котираат голем број компании кој се деловно поврзани и со Русија и со Украина, неутрално може да биде за американскиот долар (во зависност од инволвираноста на САД) а позитивно за Јапонскиот јен. Позитивно е и за обврзниците на развиените земји кои не се засегнати, но најпозитивно е за цената на златото кое во вакви околности знае да полета заради зголемената побарувачка. Ете таква е пазарната психологија во вакви вонредни околности. Имајте предвид дека ваквата состојба можеби ќе створи и зголемени можности за заработка бидејќи движењата се големи, секако во зависност од развојот на настаните може да дојде и до пресврти. Но факт е дека волатилноста значително ќе биде зголемена заради пазарната “мобилизација“.
Меѓу другите настани како поважни ќе ги издвоиме одлуките на централните банки на Европа и Англија во Четврток за висината на каматните стапки и говорот на гувернерот за согледувањата во економијата и насоките на монетарната политика. Говорот на гувернерот на ЕЦБ Марио Драги е закажан за Четврток во 14:30 часот. Под влијание на ниската инфлација и не баш добрата состојба со економијата а поготово со невработеноста очекувањата се дека гувернерот во својата реторика ќе биде умерено песимистичен и ќе говори во прилог на дополнителни олеснувања и на дополнително кратење на каматата или понатамошно одложување на евентуалното зголемување на истата. Ваквата реторика би требало да е негативна за вредноста на европската валута.
Во Петок во 14:30 е податокот за состојбата со вработеноста во САД. Со оглед дека програмата за монетарно кратење е во тек а бројот на невработени е значително намален во последниве месеци евентуалнио подобрениот број на нововработени позитивно би влијаел на американскиот долар. Единствено загрижувачки за овој податок е влијанието на мошне неповолните временските прилики во САД.
Иако во нормални услови овие се исклучително важни настани и имаат огромно влијание врз движењето на пазарите, сепак оваа недела очекуваме да помине во фокусот на развојот на настаните во Украина. А кога психологијата, односно во овој случај стравот и несигурноста ќе стапат на сцената тогаш и пазарите знаат да влезат во ирационална фаза и да подклекнат под влијанието на таквиот притисок.
