Еден новинар преправен како свештеник се обидел да влезе во болничката соба, во која е сместен Михаел Шумахер, повеќекратен шампион на Формула 1, кој доживеа тешка несреќа на скијање во Франција.
Менаџерката на Шумахер, Сабине Кем по прес-конференцијата во францускиот град Гренобл, каде тој е сместен, на новинарите на германскиот весник „Велт“ им соопштила дека новинар преоблечен како свештеник се обидел да влезе во собата на Шумахер.
– Никогаш немаше да помислам дека вакво нешто ќе се случи, рече Сабине Кем.
Лажниот свештеник наводно е исфрлен од болницата, откако е утврдено дека не е тој за кој се претставувал.
– Здравствената состојба на Шумахер е стабилна, потврди неговата менаџерка Кем.
– Неговата состојба изутрината е стабилна. Моментално тоа се добри вести, но бе би сакала да се впуштам во натамошни прогнози. Тој и натаму е во вештачки предизвикана кома, рече таа.
Шумахер во неделата на скијање во францускиот центар Мерибел се здоби со тешки повреди, откако падна и со главата удри во карпа, а моментално е во вештачки предизвикана кома и лекарите на болницата во Гренобл се борат за неговиот живот.