Стоматолозите предупредуваат дека редовното и правилно миење на забите не само што спречува кариес, туку може да помогне и во намалувањето на ризикот од повеќе од 50 болести, вклучувајќи деменција, Паркинсонова болест и ревматоиден артритис.
На голема научна конференција беа презентирани докази дека бактериите во усната шуплина можат да предизвикаат воспаление и инфекции кои се поврзани со проблеми низ целото тело – од зглобовите до мозокот и цревата.
Заболувањето на непцата може да влијае на деменцијата и артритисот
Професорот по стоматологија Алпдоган Кантарџи истакнува дека пародонтопатијата (напредна болест на непцата) не предизвикува директно деменција, но може да ги влоши или забрза проблемите кај луѓето кои веќе се посклони кон вакви болести.
Тој додава дека истражувањата покажуваат дека луѓето кои одржуваат редовна хигиена и одат на професионално чистење можат да имаат подобри когнитивни резултати. Студиите врз животни, исто така, сугерираат дека бактериите полесно можат да стигнат до други делови од телото, а белите крвни клетки понекогаш ги „носат“ низ телото.
На конференцијата беа презентирани и податоци дека бактериите поврзани со заболување на непцата може да играат улога во ревматоидниот артритис и дека можат да влијаат на цревниот микробиом, што е поврзано со поголем ризик од воспалително заболување на цревата и рак на дебелото црево.
Кантарчи, исто така, предупредува за трендовите во исхраната: многу шеќер и ултра-преработена храна, заедно со помалку готвење дома, придонесуваат за зголемување на кариесот и заболувањето на непцата.
Што препорачуваат стоматолозите?
Забите треба да се мијат 2-3 пати на ден, особено по слатка и леплива храна. Ако се мијат само еднаш, најдобро е пред спиење. Електричните четки за заби и чистењето на јазикот, кој е важен извор на бактерии, се препорачуваат за постари лица и за секој што има моторни потешкотии.
