Европските институции во Брисел будно го следат развојот на политичката криза во Франција. Владата на Мишел Барние падна, а кризата на извршната власт во втората економија на еврозоната може да има последици врз макроекономските одлуки на блокот.
Владата падна поради „пребрзо скроен буџет“, кој беше набрзина подготвен откако Барние ја презеде функцијата во септември на чело на малцинската коалиција.
Барние, лидер на Христијанско-демократската партија (Les Republicains), предложи план за намалување на јавниот дефицит на Франција, кој моментално се проценува на 6,1 отсто за оваа година, на пет отсто во 2025 година.
Андреас Ајсл, истражувач во тинк-тенкот Notre Europe, коментира за France24 дека иако Франција не се соочува со вистинска буџетска криза во однос на одржливоста на долгот, ситуацијата може да стане проблематична доколку продолжи политичката криза.
Барние стана премиер со најкраток стаж во Петтата француска република и првиот разрешен од парламентот во последните шеесет години.
Аналитичарите во ЕУ се прашуваат дали неповолната ситуација ќе се прошири и на другите земји од еврозоната, бидејќи во моментов, се чини, ниту Франција, ниту Германија немаат политичка или економска стабилност за таа улога.
Интересно е што берзите вчера го завршија трговскиот ден со раст, додека во Европа од почетокот на денешниот ден се тргува попретпазливо. Инвеститорите внимателно го следат развојот на ситуацијата.
Прашањето за доверба на Барние во парламентот го поставија екстремно десничарските и екстремно левите партии.
А во анализата на Би-Би-Си се посочува дека во овој клучен геополитички момент лидерството во ЕУ многу недостасува. Почнува да се чувствува дека нема владеење на чело на европската заедница, „со подемот на автократски лидери кои сочувствуваат со Русија во Унгарија, Словачка и Романија, додека фокусот на Франција и Германија е ослабен и расеан“.
За Франција не се гледа вистински крај на политичката нестабилност и треба да се запомни дека таа е најголемата воена сила во Европа, веднаш до Велика Британија, во време кога беснеат конфликти на Блискиот Исток и Украина, со политички тензии во двете Кореи.
Претседателот Емануел Макрон ќе назначи нов премиер, но дури и тогаш парламентот ќе остане поделен меѓу три политички блока кои меѓусебно се презираат, кои ќе можат меѓусебно да се држат во заложништво поради толку потребните реформи и новиот буџет.
Во економска смисла, може да има краткорочен скок на инфлацијата во Франција, додека трошоците за задолжување веќе се искачија на нивото на Грција. За Франција и за самата ЕУ е важно што поскоро да инсталираат нова извршна власт, се согласуваат медиумите во оваа земја.
