Израелската армија најави дека во рок од една година ќе воведе нов систем за противвоздушна одбрана за заштита на Израел од воздушни напади – „Железниот зрак“.
„Овој систем ќе биде интегриран во мрежата на израелскиот систем за противвоздушна одбрана во рок од една година“, соопшти во понеделникот Министерството за одбрана на Израел, пренесе порталот „defensenews“.
Најавата дојде откако владата потпиша договор за вооружување со компаниите Рафаел и Елбит за да го забрза развојот на оружје засновано на насочена енергија, потврди пензионираниот генерал-мајор Ејал Замир, генерален директор на министерството.
„Железниот зрак ќе функционира како дел од одбранбениот систем на Израел заедно со батериите на железната купола“, рече шефот на военото истражување, Даниел Голд, додавајќи:
„Комбинацијата на ласерско пресретнување и ракетно пресретнување дополнително ќе ја зајакне одбраната од ракети, проектили, беспилотни летала, крстосувачки ракети и други закани.
Israel says it will field Iron Beam air-defense lasers in a year https://t.co/E8sHpRcgqB
— David Pugliese (@davidpugliese) October 28, 2024
Компанијата „Рафаел“ е главен развоен партнер на системот „Железниот зрак“, додека „Елбит“ го обезбедува ласерскиот топ за овој систем. Вредноста на договорот е две милијарди шекели (536 милиони долари), при што „Рафаел“ има удел од околу 60 отсто, а „Елбит“ 40 отсто.
„Железниот зрак“ е ласерски систем за противвоздушна одбрана што се користи против различни воздушни закани како што се ракети, минофрлачки гранати, беспилотни летала и крстаречки ракети. Системот може да ги следи ниските цели и да ги неутрализира со доволно енергија.
За прв пат беше претставен во февруари 2014 година на аеромитинг во Сингапур, а по успешните тестови пред околу три години во јужен Израел, влезе во фаза на оперативен развој и адаптација на борбени услови.
Цената на проектилот, кој се користи за пресретнување во рамките на системот Iron Dome, е околу 100.000 долари, додека цената за пресретнување со помош на ласерски штит е еднаква на цената на потребната електрична енергија.
Ласерското пресретнување има за цел да ја револуционизира економијата на воздушната одбрана, која досега ги фаворизираше напаѓачите бидејќи ракетите и беспилотните летала се поевтини за лансирање отколку за соборување.
Израелската противвоздушна одбрана се соочува со закани со беспилотни летала од Либан, Ирак и Јемен, како и со десетици илјади ракети испукани на земја од почетокот на војната против Хамас и поврзаните терористички групи.
Сепак, ласерскиот систем има ограничувања во споредба со Железната купола кога станува збор за одбрана од тешки ракетни истрели, како и во денови со слаба видливост поради облаци, дожд или песочни бури.
