Турција и нејзините компании заштедија околу 2 милијарди долари на сметки за енергија во 2023-та година со зголемување на увозот на руска нафта и рафинирани производи со попуст.
Тоа е според пресметката на „Reuters“ врз основа на податоците на „LSEG“ и проценките на трговците, а Анкара продолжува да купува повеќе руска нафта и покрај санкциите од Западот, додава агенцијата.
Турција стана најголемиот увозник на руски гас и нафтени производи по руската инвазија на Украина што ги натера европските земји да го замрзнат увозот.
Кина и Индија увезуваат поголеми количини од Русија од Турција, но близината на Анкара до руските пристаништа значи дека таа заштедува повеќе од другите купувачи благодарение на поевтината испорака, забележа „Reuters“.
Испораките на руска сурова нафта од Урал во Турција се искачија на историски највисоко ниво од 400.000 барели дневно во ноември 2023-та година, што претставува околу 14 отсто од вкупниот извоз на руска нафта по морски пат минатиот месец, покажаа податоците на „LSEG“ и пресметките на агенцијата.
Руското Министерство за енергетика одби да коментира. Турското Министерство за енергетика, „Turpas“ и рафинеријата „STAR“ не одговорија на барањата за коментар.
Испораките за Турција се очекува дополнително да се зголемат во наредните месеци, откако приватниот руски производител на нафта „Lukoil“ потпиша договор со азербејџанскиот „SOCAR“ за рафинирање до 200.000 барели дневно од својата нафта во турската рафинерија „STAR“ на „SOCAR“, соопштија трговски извори.
Покрај зголемените резерви на сурова нафта, турскиот увоз на руско дизел гориво, мазут, авионско гориво и поморско гориво скокна за 200 отсто во периодот јануари-ноември 2023-та година на околу 0,29 милиони барели дневно.
За периодот јануари-ноември 2023 година, Русија и достави на Турција 13 милиони тони дестилати, вклучително и 8,6 милиони тони дизел со ултра ниска содржина на сулфур (ULSD 10 ppm), во споредба со 4,3 милиони тони дестилати, вклучувајќи 3,2 милиони тони „ULSD“ за истиот период во 2022 година, покажуваат податоците од „LSEG“ и трговците.
Според трговците, Турција платила меѓу 25 и 150 долари помалку за тон (3,3-20 долари за барел) руски дизел оваа година отколку цените за слични класи во Медитеранот.
За сурова нафта имаше попусти од 5-20 долари за барел. Поевтиниот увоз на енергија и помогна на Анкара да го намали трговскиот дефицит и да го намали притисокот врз нејзината валута, која до сега оваа година падна за 30 отсто. Турција, исто така, го зголеми извозот на дизел во истиот период за 120 отсто на 6,03 милиони тони од 2,75 милиони тони во периодот јануари-ноември 2023-та година, според податоците на „LSEG“.
Голем број активисти и поддржувачи на Украина ја обвинија Турција дека ефикасно и помага на Русија да ги насочи своите производи во Европа, заобиколувајќи ги санкциите. Сепак, земјата ги негира обвинувањата и вели дека извезува горива рафинирани од различни видови сурова нафта.
Турција не е единствената земја која ужива големи заштеди од руската набавка на нафта, забележува „Reuters“.
Индија, која исто така одби да се приклучи на санкциите против Москва, го зголеми увозот на руска нафта за 77 отсто досега оваа година. Според пресметките врз основа на владините податоци, во првите девет месеци од 2023-та година заштедила околу 2,7 милијарди долари од увоз на руска нафта. Но, во исто време, земјата увезуваше многу поголеми количини руска нафта од 1,7 милиони барели дневно, што значи дека заштедите по барел за Турција беа многу поголеми.
Според пресметките на трговците, во моментов чини 6 милиони долари за испорака на танкер со руска нафта во Турција, додека за Индија чини 9 милиони долари.
Аналитичарот на „Kpler’s“, Виктор Катона, рече дека турските рафинерии станаа едни од најпрофитабилните фабрики во Средоземното Море откако руските санкции беа воведени од Западот во февруари 2022-ра година.
Аналитичарот додаде дека најголемата турска нафтена рафинерија „Tupras“ минатата година имала бруто профитна маржа од 30 долари за барел, што е 6 долари за барел повеќе од просечната маржа за комплексна рафинерија во Средоземното Море.
Покрај тоа, Москва и Анкара исто така разговараат за создавање центар за руски гас во Турција, според „Tupras“.
Планот е во согласност со долгогодишната желба на Анкара да стане главен центар за дистрибуција на енергија за јужна Европа. Русија го гледа центарот како начин да го пренасочи својот извоз на гас од Европа или индиректно да и продаде дел од гасот на ЕУ.
