Повеќе од еден милион Палестинци во северниот дел на Газа се соочија со израелскиот рок за бегство на југ, а премиерот Бенјамин Нетанјаху рече дека Израел само што почнува да возвраќа на минатонеделните напади на Хамас во јужен Израел. Израелската армија потврди дека голем број цивили се движат кон југ. „Видовме значително движење на палестински цивили кон југ“, изјави портпаролот на израелската војска Џонатан Конрикус.
„Околу појасот Газа, израелските резервисти се подготвуваат за следната фаза од операциите. Тие се насекаде околу Појасот Газа, на југ, во центарот и на север, и се подготвуваат за секоја цел што ќе ја добијат, за секоја задача. „Ќе го уништиме Хамас и неговиот воен капацитет и фундаментално ќе ја промениме ситуацијата, така што Хамас никогаш повеќе нема да има способност да нанесе каква било штета на израелските цивили или војници“, рече Конрикус.
Американскиот претседател Џозеф Бајден рече дека се во тек консултации со регионалните влади за хуманитарната криза во Газа, бидејќи опколените Палестинци се соочуваат со недостиг на храна и вода и без струја поради жестокото израелско бомбардирање и блокада.
Израел вети дека ќе го уништи Хамас поради нападот пред една недела во кој неговите борци убија 1.300 Израелци, претежно цивили, а зедоа десетици како заложници.
Израел оттогаш го стави Појасот Газа, дом на 2,3 милиони Палестинци управуван од Хамас, под целосна опсада и го бомбардираше со невидени воздушни напади. Властите во Газа соопштија дека се убиени 1.900 луѓе.
Повеќе од милион жители на северна Газа добија 24 часа од Израел во петокот да побегнат на југ пред очекуваната копнена офанзива. Хамас вети дека ќе се бори до последната капка крв и им порача на жителите да останат на место.
ОН предупредија на катастрофа
Обединетите нации и другите организации предупредија на катастрофа доколку толку многу луѓе бидат принудени да бегаат и рекоа дека опсадата треба да се укине за да се дозволи помош.
„Потребен ни е итен хуманитарен пристап до цела Газа, за да можеме да добиеме гориво, храна и вода за сите на кои им е потребно. Дури и војните имаат правила“, рече во петокот секретарот на ОН, Антонио Гутереш.
Портпаролот на ОН Стефан Дујарик рече дека преселувањето на толку многу жители на Газа на југ нема да биде без „погубни хуманитарни последици“, што предизвика укор од Израел дека ОН треба да го осудат Хамас и да го поддржат правото на Израел на самоодбрана.
„Јамката околу цивилното население во Газа се стега. Како 1,1 милион луѓе треба да се движат низ густо населена воена зона за помалку од 24 часа“, напиша на социјалните мрежи шефот за хуманитарна помош на ОН, Мартин Грифитс.
Махмуд Абас, претседател на палестинската управа, му рече на американскиот државен секретар Антонио Блинкен во Јордан дека присилното раселување ќе биде повторување на 1948 година, кога стотици илјади Палестинци побегнаа или беа протерани од она што сега е Израел.
Повеќето жители на Газа се потомци на такви бегалци. Газа е едно од најгусто населените места во светот и засега нема излез од него. Повиците за хуманитарен коридор или пат за бегство за Палестинците од Газа предизвикаа остра реакција кај арапските соседи.
Египет, единствената арапска земја што ја дели границата со Газа и Јордан, кој се граничи со Западниот Брег, окупиран од Израел, предупредија да не се протеруваат Палестинците од нивната земја, а Египет одби да ја отвори границата.
Тоа ги одразува длабоките арапски стравови дека последната војна на Израел со Хамас во Газа може да предизвика нов бран на трајно раселување од земјата на која Палестинците сакаат да изградат идна држава.
За Палестинците, идејата да ја напуштат или да бидат протерани од земјата на која сакаат да основаат држава носи оддек на „накба“ или „катастрофа“, кога многу Палестинци ги напуштија своите домови за време на војната во 1948 година што следеше по создавањето на Израел.
Околу 700.000 Палестинци, половина од арапското население на Палестина под британско владеење, потоа побегнаа или беа протерани од своите домови, а многумина се прелеаа во соседните арапски држави каде што останаа тие или многу од нивните потомци. Милиони луѓе сè уште живеат во бегалски кампови.
Американскиот секретар за одбрана Лојд Остин во петокот се состана со израелскиот министер за одбрана Јоав Галан. Остин рече дека воена помош доаѓа до Израел, но дека ова е време за решителност, а не за одмазда.
