„Google“ објави значајно безбедносно ажурирање во „Android 16“. Оперативниот систем ќе може да препознае кога вашиот телефон е поврзан со лажна базна станица, што може да укаже на обид за прислушување или следење на вашата локација.
Оваа функција е особено важна бидејќи таканаречените уреди „stingray“, кои имитираат мобилни кули, можат да го измамат вашиот телефон да се поврзе со небезбедна мрежа – дозволувајќи им на потенцијалните напаѓачи да пристапат до вашите повици, пораки и други податоци.
Во поставките на вашиот телефон ќе се појави нова опција наречена „Mobile network security“, каде што корисниците ќе можат да ги вклучат мрежните известувања. Кога ќе се активира оваа функција, „Android“ ќе ве предупреди ако вашиот телефон се префрли на необезбедена мрежа или ако мрежата побара чувствителни податоци како што се „IMEI“ или „IMSI“ броеви.
Исто така, ќе има опција за оневозможување на 2G поврзувањето, кое е најранливо на вакви напади.
Иако оваа функција доаѓа со „Android 16“, таа нема да биде достапна на сите уреди. Ќе биде ограничено на телефони што доаѓаат со најновиот хардвер што поддржува „Radio HAL 3.0“. Ова значи дека повеќето постоечки уреди, дури и со „Android 16“, нема да можат да ја користат оваа опција.
„Google“ нагласува дека функцијата ќе биде исклучена по инсталацијата, а корисниците ќе мора сами да ја активираат во поставките.
Се очекува функцијата прво да биде достапна на телефоните „Google Pixel“, додека другите производители мора да ја имплементираат според нивните софтверски планови.
