Истражувачката лабораторија за вештачка интелигенција „OpenAI“ ја лансираше најновата верзија на својот јазичен софтвер – GPT-4, напредна алатка за анализа на слики и имитација на човечки говор, со што уште еднаш ги поместува техничките граници на бранот на вештачка интелигенција што се шири со брзина на светлината.
Долгоочекуваната алатка означува голем чекор напред кога е во прашање моќта на вештачката интелигенција, но покренува и нови прашања кога станува збор за етичките норми во примената на оваа технологија.
Ново-стар ChatGPT
Неодамна објавениот ChatGPT од Open AI Lab ја воодушеви и во исто време ја вознемири јавноста со својата способност да води природни разговори, предизвикувајќи вистински бран од вирални објави, есеи, скрипти и разговори генерирани од бот.
Сепак, ChatGPT се потпираше на постарата генерација на технологија која не го претставуваше максимумот за кој моментално е способна вештачката интелигенција, пишува „Вашингтон пост“.
Спротивно на тоа, GPT-4 е најсовремен систем кој може да направи многу повеќе отколку да генерира реченици. Покрај текстот, може да анализира различни слики и медиуми.
Програмерите во вторникот објавија дека новата технологија може драстично да ја продлабочи револуцијата на вештачката интелигенција, но ветувањата предизвикаа и одредено гнев кај јавноста, која верува дека таквите напредни системи за вештачка интелигенција можат да заменат многу работни места од кои зависат милиони луѓе.
Официјални лица од лабораторијата во Сан Франциско рекоа дека „мултимодалната“ обука за текст и слики на GPT-4 ќе му овозможи на четботот да избега од полето за разговор и поцелосно да го имитира светот на боите и сликите, надминувајќи го ChatGPT во неговите „напредни способности за заклучување“.
Најголемите стравови се остваруваат
Кога при првичното тестирање му била покажана слика од клацкалка со тег од едната страна и топка од другата страна, GPT 4 успешно ја анализирал фотографијата и објаснил дека ако тегот падне, топката ќе летне во воздух.
Проблемот со ова е што моделот, поради неговата способност да препознава ситуации, предмети и слики, може да погледне слика на голема група луѓе и да понуди информации за нив лоцирани на различни страни на Интернет, вклучувајќи го и нивниот идентитет.
Најголемиот страв е дека таквиот систем би можел да се користи за масовен надзор поради неговата способност да препознава лица.
Сандини Агарвал, истражувач во OpenAI, изјави за Вашингтон пост дека компанијата затоа ја задржала оваа карактеристика со цел подобро да ги проучи сите потенцијални ризици.
Дополнително, истражувачите на OpenAI напишаа во технички извештај: „Како што GPT-4 и системите за вештачка интелигенција како него стануваат се пошироко усвоени, тие ќе имаат уште поголем потенцијал да ги зајакнат цели идеологии, светогледи, заблуди, невистини и ќе ги зацементираат верувања во теориите на заговор.
Молскавично брзиот напредок на вештачката интелигенција, заедно со неверојатната популарност на ChatGPT, поттикна трка од повеќе милијарди долари за идна доминација во оваа област.
Напливот на популарноста на овие алатки, исто така, предизвика критики дека компаниите брзаат да ја искористат непроверената, нерегулирана и непредвидлива технологија која може да ги измами луѓето, да ја поткопа работата на уметниците и да доведе до штета во реалниот свет.
Портпаролот на OpenAI, Нико Феликс, во таа прилика изјави дека компанијата „планира да спроведе заштитни мерки за да спречи кражба на идентитет и други видови злоупотреба“.
OpenAI во изјавата рече дека GPT-4 сè уште прави некои од грешките што ги направи ChatGPT, како што се лоши совети, и дека неговите одговори во голема мера ги одразуваат социјалните предрасуди.
Тој, исто така, нема познавање за настаните што се случија по септември 2021 година, кога беа финализирани податоците за обуката.
