НЕДЕЛЕН ПРЕГЛЕД
(16.09 – 20.09.2013)
Уште една недела е зад нас која по ништо не се разликуваше од претходните и брзо ќе отиде во заборавот на времето. Прометот – низок и без сигнали за негов скорешен пораст, индексот МБИ10 речиси непроменет и оваа недела забележа пораст од само +0,02%. Индекост МБИД од минатата недела повеќе не се пресметува на Македонската берза.
Прометот достигна безмалку 21 милион денари во редовното тргување, од кои на тргување со државни обврзници отпаднаа 7,1 милион денари или 34%. Очигледно дека прометот со акции никако да се опорави и малиот промет веќе станува хроничен проблем. Неколку акции успеаја да евидентираат промет од над 1 милион денари, што е недоволно ниту за нив да се констатира дека имаат некое ниво на ликвидност. Македонски Телеком Скопје беше најтргувана акција со 2,7 милиони денари неделен промет (од понеделникот акцијата е дел од индексот МБИ-10), Акалоид Скопје и Макпетрол Скопје имаа идентичен промет од по 2,1 милион денари, Комерцијална банка Скопје реализираше промет од 1,9 милиони денари, а Осигурување Македонија Скопје од рамно 1 милион. Отсуството на некои поважни ценовно чувствителни информации од котираните компании го докомплетираше општиот впечаток за минатата недела на Македонската берза.
На регионалните берзи индексите имаа релативно мали корекции, со исклучок на словенечкиот SBI10 кој неделата ја заврши со посилен пораст од 2,30%, Crobex забележа пад од -0,09%, додека Belex имаше пад од -1,08%.
Одлуката на Федералната комисија за отоворен пазар на САД да не ја менува монетарната политика и да се воздржи од ограничувањето на стимулациите во економијата, придонесе берзите преку Атлантикот да пораснат во средата и да ги елиминираат загубите од првите два трговски дена во неделата. Сепак, DOW JONES неделата ја заврши со пад од -0,28%, додека NASDAQ имаше неделен раст од +1,53%, а S&P 500 неделата ја заврши со пораст од +0,73%. Европските берзи главно го следеа движењето на американските па и тие неделата ја завршија со пораст. DAX забележа неделен раст од +0,73%, FTSE 100 ја затвори неделата со благ пад од -0,40%, додека францускиот CAC 40 имаше пораст од 1,24%. На азиските берзи, јапонскиот NIKKEI 225 имаше пораст од +2,34%. HANG-SENG неделата ја заврши со раст од +1,08%.
Коментари