Германското Министерство за надворешни работи предложи построги регулативи за компаниите изложени на Кина и ограничени гаранции за инвестиции за да се намали зависноста од извозот, се вели во доверлив нацрт-документ што го видел Ројтерс.
Министерството за надворешни работи, предводено од Аналена Баербок од Партијата на зелените, ги предложи мерките како дел од новата деловна стратегија кон Кина, изготвена од владата на канцеларот Олаф Шолц за да се намали зависноста на економијата од азиската економска суперсила.
„Целта е да се искористат инструментите на пазарната економија за промена на структурата на поттик за германските компании со цел намалувањето на зависноста од извозот да се направи попривлечно“, се наведува во документот, кој ги издвојува хемиската и автомобилската индустрија.
„Бранот кинески инвестиции во последниве години предизвика загриженост во Европа“
Портпаролот на Министерството за надворешни работи одби да го коментира нацрт-документот. Кина е најголемиот трговски партнер на Германија од 2016 година, а нејзиниот силен раст во последните две децении оди рака под рака со силната побарувачка за германски автомобили и машини.
Но, бранот кинески инвестиции во последниве години предизвика загриженост во Европа и голем број влади одлучија внимателно да ги испитаат кинеските преземања на домашните компании, стравувајќи на прво место од трансфер на технологија.
Така, кинескиот Huawei беше исклучен од изградбата на мобилни мрежи од новата генерација во многу европски земји, а владата во Германија неодамна интервенираше во кинеското купување акции на пристанишниот терминал во Хамбург, со цел да го блокира влијанието на COSCO врз деловните одлуки.
Во меѓувреме, Берлин сигнализираше дека има намера да го ограничи бизнисот на домашните компании во Кина, а Министерството за надворешни работи во документот прави паралела со зависноста на Германија од рускиот гас. „Не смееме да ја повториме таа грешка. Тоа е одговорност на политичарите и компаниите“, се наведува во документот. Министерството за надворешни работи сака построги регулативи за компаниите активни во Кина да ги земат предвид геополитичките ризици.
Министерството предлага и построга регулатива за гаранциите за кредитите на извозниците
„Наша цел е да ги обврземе компаниите со посебна изложеност на Кина да ги наведат и сумираат релевантните настани и бројки поврзани со Кина, на пример во форма на посебна обврска за известување, врз основа на постоечките барања за откривање податоци“, се наведува во документот.
„Врз основа на ова, ќе процениме дали овие компании треба редовно да ја проверуваат нивната отпорност на негативни сценарија со цел навремено да ги идентификуваат ризиците специфични за Кина и да преземат корективни мерки.
Гаранциите за инвестиции ќе бидат предмет на построг надзор за да се земе предвид влијанието врз животната средина и почитувањето на работните и социјалните стандарди и да се избегне принудна работа во синџирот на снабдување, се вели во документот. Износот на овие гаранции треба да биде ограничен на три милијарди евра по компанија и по земја на дестинација за да се избегне акумулација на ризик, се додава.
Министерството за надворешни работи предлага и построги регулативи за гаранциите за заемите на извозниците со цел да се избегне несакан трансфер на технологија, особено онаа што може да се користи за воени и цивилни цели, односно за надзор и репресија, се наведува во документот.
Новата стратегија силно ја туркаат Зелените
Коментирајќи го нацрт-документот, кинеското Министерство за надворешни работи изјави за Ројтерс дека се надева дека Германија ќе ги развие односите „објективно и рационално“ и ќе усвои политики што ќе бидат корисни за двете земји.
Нацрт-документот сепак мора да биде одобрен од другите министерства во владата, а конечната одлука за стратегијата кон Кина се очекува на почетокот на следната година, забележува Ројтерс. Новата стратегија, силно наметната од Зелените во коалициската влада предводена од социјалдемократскиот канцелар Олаф Шолц, означува отстапување од политиката на Берлин во времето на поранешната конзервативна канцеларка Ангела Меркел, потсетува агенцијата.
