„Газпром“ минатата година го зголеми извозот кон своите главни купувачи во Европа, како и кон Турција и Кина. Сепак, протокот остана под нивото пред пандемијата поради ограничените залихи на Европската унија (ЕУ) како целина во последните месеци, објави „Bloomberg“, цитирајќи соопштение на компанијата.
Рускиот гасен гигант испорача 185,1 милијарди кубни метри на клиенти надвор од поранешниот Советски Сојуз, изјави извршниот директор Алексеј Милер. Ова е за 3,2% над нивоата од 2020-та година, но помалку отколку во 2018-та и 2019-та година, кога беа испорачани околу 200 милијарди кубни метри.
Дневниот извоз во декември, кога започнува сезоната на побарувачка, во просек изнесувал 439 милиони кубни метри – најниско ниво за овој месец од 2014-та година, според проценките на „Bloomberg“.
Извозот на „Газпром“ внимателно се следи, бидејќи ограничените испораки во Европа доведоа до рекордно зголемување на цените. Со почетокот на зимата, регионот останува со опасно ниски резерви, а руската компанија испраќа само онолку гас за клиентите од ЕУ, колку што е обврзана со долгорочни договори, а со месеци не нуди превоз на самото место.
Не е јасно зошто „Газпром“ не нуди спот гас за Европа. Европските власти велат дека тоа е алатка за притисок за да се забрза одобрувањето на контроверзниот гасовод „Северен поток 2“.
„Газпром“ не ги објави податоците за извозот по земји, што го отежнува проценувањето на тековите за 2021-ва година на одделни пазари. Милер вели дека најголемиот раст на понудата е за водечките европски клиенти – Германија, Турција и Италија. Протоците кон Кина ги надминуваат договорните обврски на „Газпром“ во 2021-ва година, според Алексеј Милер.
Производството на гас на „Газпром“ во 2021-ва година достигна 514,8 милијарди кубни метри, највисоко од 2008-ма година. Дневното производство во декември во просек изнесуваше 1,523 милијарди кубни метри – највисоко за овој месец од 2013-та година.
Бидејќи извозот во повеќето земји од ЕУ беше ограничен во декември, најголемиот дел од дополнителниот гас останува во Русија. Како што паѓаат температурите, испораките за локалните клиенти се зголемија на 1,656 милијарди кубни метри дневно на крајот на декември, според „Газпром“.
За да се задоволи побарувачката, компанијата рече дека повлекувањата од локалните подземни складишта достигнаа највисоко ниво во последните пет години. Русија може да си дозволи да користи рекордни количини од своите резерви, бидејќи „Газпром“ ги наполни локалните капацитети со рекордни количини гас до ноември.
