Дали германската канцеларка Ангела Меркел е одговорна за одложувањето на започнувањето на вакцинацијата против коронавирусот? За ова жестоко се дебатираше. Другите земји вакцинираат побрзо. Надлежниот министер Шпан сака да ја забрза целата работа.
Најголемиот германски булеварски весник „Билд“ во понеделникот (4 јануари) имаше наслов: „Вака Меркел го кочеше купувањето на вакцината“. Во текстот во суштина се тврди дека министерот за здравство Јенс Шпан сакал да склучи сојуз со колегите од Франција, Италија и Холандија во јуни за да нарача 400 милиони дози вакцини против коронавирусот од производителот на вакцини „АстраЗенека“, но Ангела Меркел го запрела, пишува Дојче Веле.
Германската канцеларка наводно не сакала да биде критикувана за набавката на вакцината без договор со другите членки на Европската унија. Таа се залагала за решение од Европската комисија, во кое биле вклучени сите 27 земји на ЕУ.
Портпаролот на германската влада Стивен Зајберт начелно го потврдил ова во понеделникот: „Ние свесно баравме заеднички европски пристап со партнерите“. Тој рече дека владата стои зад ваквиот пристап. Зајберт, сепак, не гледа никаква инхибиција на надлежниот министер во тоа. Сепак, тој рече дека нетрпеливоста и многу прашања кои се појавија се оправдани.
Само 1,3 милиони дози во Германија
„Билд“ наведува дека Германија нарачала 300 милиони дози од францускиот концерн „Санофи“ во септември, но се чини дека концернот може да ја испорача вакцината дури на крајот на 2021. Дали Германија стави сè на погрешна карта? Дали е тоа причината за првичната бавност на вакцинацијата во Германија?
Факт е дека провинциите добиле 1,3 милиони дози и било најавено дека тие ќе добијат уште 600 000 дози во средината на јануари. Прво, ќе се вакцинираат луѓето во домовите за стари лица и сите постари од 80 години, но и негувателките и загрозениот болнички персонал.
Факт е дека вакцинацијата се одвива многу побрзо во земји како Велика Британија, Израел или САД. Сега и таканаречената „Оксфордска вакцина“ се користи во Велика Британија од понеделникот.
ЕУ не работела ефикасно
Наводно, Европската унија склучила договор со водечкиот производител Бајонтек од Мајнц дури во средината на ноември, додека Американците нарачале 600 милиони дози во јули. Угур Шахин, шеф на компанијата Бајонтек, за неделникот „Шпигел“ изјави дека е изненаден од двоумењето на Брисел при нарачката на вакцината.
Според извештаите на медиумите, источноевропските земји и Франција се воздржале од вакцината на германскиот производител, меѓу другото и поради високата цена. Социјалдемократите (СПД), како коалициски партнер на демохристијаните (ЦДУ) во германската влада, веќе ја критикувале бавноста на процесот.
Генералниот секретар на СПД, Ларс Клингбејл, за Првата програма на германската телевизија АРД изјави дека е правилно да се најде „европско решение“, но тој исто така рече дека „Европа не мора да значи бавност“. Тој додаде: „Тоа не може така, земјата во која преку истражување дојде до вакцината, да остане без доволно дози“.
Коментари