Неквалитетна бела техника, непочитување гарантен рок, лоши услуги на операторите – ова се најчестите поплаки на граѓаните кои стигнуваат на адреса на Организацијата на потрошувачи на Македонија (ОПМ).
Бројот на претставки има тенденција на раст – само минатата година стигнале вкупно 2.886. Од нив 2.142 биле телефонски, 485 лични, 228 електронски и 21 преку редовна пошта.
Според штотуку објавениот извештај на ОПМ околу 17% од поплаките се однесуваат на технички апарати, речиси 10% за телекомуникациски услуги, 7% за производи за лична употреба, 5% за производи кои се користат во домот, 4% за туристички патувања.
„Се повеќе се случува потрошувачите да пријават дека им е доставен механички оштетен производ“ стои во извештајот од ОПМ.
Оттаму советуваат дека потрошувачот треба секогаш да го провери производот пред да потпише дека му е доставен бидејќи кога ќе го направат потврдуваат дека му бил доставен во исправна состојба, без оштетувања.
„Додека трае гарантниот рок расипаниот производ треба да се сервисира до три пати, а ако повторно се појави дефект треба да се замени со нов, со оглед на тоа што купувате производ со определени употребни својства кои треба да ги има. Расипаното не смее да стои повеќе од 30 дена на сервисирање, а за тоа време треба да се обезбеди соодветна замена“, објаснуваат во ОПМ.
За облеката советот е да се чува фискалната сметка бидејќи иако за неа не се издава гарантен лист како кај техничките производи, согласно законот и тие имаат гаранција од 6 месеци.
„Голем број поплаки од потрошувачите пристигнаа за обувки и облека, односно потрошувачите се жалеа на неквалитетен материјал кој веднаш се оштетил“ стои во извештајот.
Кај храната најголем дел од претставките се однесувале на декларациите за кои потрошувачите се жалеле дека е со премногу мали букви, дека воопшто ја нема, дека не е на македонски јазик и кирилско писмо… Мал дел од пријавите биле за производи со поминат рок или за неквалитетни производи.
Освен организацијата на потрошувачи и повеќе државни органи воведоа директни телефонски линии за пријавување на неправилности.
Расипана или храна со изминат рок се пријавува во Агенцијата за храна на 0800 3 22 22.
Виски телефонски сметки или лоша услуга од телекомуникациските оператори се пријавува во Агенцијата за електронски комуникации на 190.
Неиздавање фискална сметка и слични проблеми се пријавуваат до Државниот пазарен инспекторат на 02 / 3220 – 547.
Македонија ги има имплементирано сите европски директиви во оваа област, пред законот муштеријата најчесто има право, но продавачите, сервисерите и давателите на услуги не секогаш го прифаќаат тоа.
К. Н.
