Снимањето на македонскиот игран долгометражен филм „Ефектот на среќа“ (The Happiness Effect) почна денеска во Скопје.
Филмот ја следи приказната на младата Леа, која се бори за своето здравје и преиспитувајќи го својот живот, почнува невообичаена потрага по среќата, ефектите од неа врз другите луѓе и можноста од нејзино ширење и мултиплицирање.
Филмот е урбана драма, која ја обработува универзалната потрага по среќа и барањето на смислата на животот. Режисер и сценарист е Борјан Зафировски, а соработник на сценариото е Дејан Дуковски.
Во главните улоги се Дејана Поповска, Сашко Коцев и Ана Стојановска, а во другите улоги се појавуваат Сара Анастасовска, Јовица Михајловски, Петар Арсовски и Мими Таневска.
„Ефектот на среќа“ е во продукција на „Ново македонско видео“, најголемиот дел од буџетот е обезбеден од Агенција за филм на Република Македонија. Копродуценти се „Њу момент“, „Видео хаус анимејшн“, Националниот центар за филм на Република Албанија и Центарот за филм на Косово.
Филмот ќе се снима во следните 30 дена на локации во Скопје и Охрид.