Писателката Лидија Димковска денеска на авторска вечер ќе го промовира хрватскиот превод од својот роман „Скриена камера“ на 10. Саем на книгата и фестивал на автори „Врисак“, кој се одржува во Риека, Хрватска. Преводот го објави ВБЗ од Загреб, во едицијата „Низ Европа во 30 романи“.
На настанот ќе учествуваат и преведувачката на романот, проф. Борјана Прошев Оливер, и хрватските новинари Војо Шиљак и Кораљка Пенавин.
На фестивалот во Риека со свои книжевни претставувања и разговори учествуваат реномирани европски и хрватски книжевни имиња ,како Александар Хемон, Славенка Дракулиќ, Владимир Пиштало, Кларе Азопарди, Срѓан Ваљаревиќ, Клаудио Магрис, Слободан Шнајдер, Беке Чуфај и други.
На завршната книжевна вечер, на 9 јуни, на Велики Лошињ, Лидија Димковска ќе учестува на читањето заедно со хрватските писатели Зоран Фериќ, Драго Гламузина, Ивица Пртењача и Беким Сејрановиќ.
Покрај „Скриена камера“ во издание на ВБЗ, на хрватски е објавен и нејзиниот роман „Резервен живот“ кој повеќе седмици беше на топ-листата на најчитани книги на издавачката куќа „Љевак“ од Загреб.