Познатиот македонски и балкански гитарист Влатко Стефановски вечерва ќе има целовечерен настап во Тирана во рамките на Фестивалот на гитаристи што го организира Универзитетот за уметности во албанскиот главен град.
На овој Фестивал на познати гитаристи, Стефановски според албанските медиуми ќе настапи со своите хитови. Медиумите во Албанија посветуваат нагласено внимание на настапот на Стефановски кој е познато име во европската рок-музиката и во Албанија. Истите извори наведуваат дека интересот за Стефановски и неговата музика ее голем.
Никола Ѓурѓај, главниот уредник на весникот ,,Илинден“ на Македонците во Албанија вели дека на концертот на Стефановски ќе присуствуваат и голем број Македонци кои живеат во Албанија.
Според него, Влатко Стефановски и групата „Леб и Сол“, во Албанија се мошне почитувани и нивната музика се слуша со особен интерес. Организаторите на овој Фестивал на познатите гитаристи оценуваат дека Стефановски заслужува особено внимание со неговата висококвалитетна рок-музика полна со македонски фолклор.
