Економијата на Македонија годинава и наредната 2015-та, според последната прогноза на Меѓународниот монетарен фонд, ќе има најголем раст во регионот. Во последниот извештај, ММФ предвидува македонската економија годинава да порасне за 3,4 проценти, а следната за 3,6 отсто.
Според извештајот, инфлацијата годинава ќе изнесува 0,6 отсто и 2,3 отсто во наредната. Дефицитот на тековната сметка е проектиран на 4,6 отсто и 5,7 отсто во 2015.
Растот на БДП во Црна Гора според прогнозите ќе биде 2,3 проценти за оваа и 3,4 отсто за наредната година, во Албанија 2,1 отсто годинава и 3,3 отсто во 2015 година и во БиХ 0,7 отсто за оваа и 3,5 отсто за догодина. За Хрватска и Србија се предвидува рецесија.
ММФ пред годишниот состанок со Светска банка во Вашингтон ја намали прогнозата на растот за светската економија и се очекува раст на БДП да биде 3,3 проценти за оваа и 3,8 отсто наредната година.
Меѓународниот монетарен фонд двапати во годината објавува редовни прогнози за глобалната економија, на пролет и на есен. Од финансиската криза во 2008 година објавува и ажурирани меѓупрогнози за водечките економии и регионите во светот.
