Германскиот економски раст ќе остане силен во втората половина од годината темелен врз зголемената потрошувачка и извозот, но глобалната прогноза е пригушена поради зголемениот ризик од забавување на растот во Кина, објави Централната банка на Германија.
Оптимистичката прогноза за Германија, најголемата европска економија, објавена е по добрите, иако не спектакуларни податоци за растот во вториот квартал, кои покажаа дека бруто домашниот производ во вториот квартал е зголемен за 0,4 отсто.
Мешовитиот резултат во минатото тромесечје го потцрта падот на индустриското производство и извозот, но и силни инвестиции и необично силните индустриски нарачки.
Од централната банка во редовниот месечен извештај за август проценија дека на германската економија на рака и оди големото зголемување на реалниот доход во матичната држава, како и закрепнување на еврозоната, послабото евро и забрзаниот раст во САД и Велика Британија, клучните трговски партнери.
„Гледано од сегашна перспектива, се чини дека не постојат претпоставки за релативно силен раст, поттикна со домашна и странска побарувачка“, се наведува во извештајот.
Оптимизам е искажан и во поглед на Грција, со прогноза за постепено подобрување на состојбата во економијата, со поддршка на новиот пакет на финансирање, приходи од туризмот и инвестиции финансирани од европските структурни фондови.
Нормализацијата на работењето на банките исто така ќе и помогне на грчката економија, како и фискалното и прилагодувањето на платите, се истакнува во извештајот.
Прогнозата за Кина е нешто повнимателна, со акцент на значително побавниот економски раст. Минатата недела централната банка неочекувано го девалвираше јуанот, за 4,6 отсто, што во главно е протолкувано како мерка на поддршка за подзабавената економија.
„Ризиците од посилно економско забавување и натаму се високи“, констатираат во Bundesbank.
„Одлуката за кинеската централна банка за девалвација на јуанот кон доларот може да се смета за потврда за неизвесноста“, се истакнува.
