На воведно место во новиот број на познатото српско списание „Монс ауреус“, во рубриката „По трагите на Орфеј“ се објавени избрани песни препеани на српски јазик од афирмираните македонски поети Санде Стојчевски, Ристо Лазаров, Бранко Цветкоски, Лидија Димковска и Јовица Тасевски-Етернијан.
Секој од македонските автори во списанието е претставен со десет песни, а изборот и препевот го направи академик Ристо Василевски.
Списанието „Монс ауреус“ излегува четири пати годишно, а негова основна цел е да објавува прилози со кои српската читателска публика се запознава со достигнувањата на современата книжевна сцена. Автори и соработници на ова списание се еминентни творци од различни области.