Кечапот е ароматичен додаток за јадењата направен од домати, различни зеленчуци и зачини. И, да не заборавиме – шеќер.
За поголемиот дел од луѓето, кечапот е составен додаток на сендвичот, хамбургерот, помфритот и останатата брза храна. Сепак, вашиот омилен додаток на брза храна всушност е полн со шеќери, дури и повеќе од што мислите.
Една порција кечап (количина на една супена лажица) содржи дури 4 грама шеќер, додека малото пакување на кечап кое се служи по рестораните за брза храна содржи повеќе од 2 грама.
Препорачаниот дневен внес на шеќер е околу 10 проценти од вкупната количина на храната, отприлика од 50 до 60 грама, а во таа количина се вклучени и шеќерите од сите слатки намирници, како и овошјето. Најмногу шеќер се наоѓа во газираните пијалоци, пивото, колачите и соковите.
Шеќерот всушност е главен виновник за епидемијата на дебелина, која доведува до многубројни здравствени проблеми како што се дијабетес и срцеви заболувања.
И без оглед на предупредувањата од докторите и нутриционистите за опасностите од тоа, човекот во просек за време на животот јаде околу 1,75 тони шеќер.