Издавачката куќа „Антолог“ од Скопје објави дека денес официјално ќе се отвори нивниот прв јавен простор во 16-годишното постоење.
Книжевниот центар „Антолог“ на улица „Ѓорѓи Пулевски“ број 29 во Дебар Маало е замислен како изложбено-продажен салон во кој, освен книгите на „Антолог“, посетителите ќе може да присуствуваат и на различни настани од областа на културата и уметноста. Работните часови се од 10-18ч.
Во чест на отворањето, „Антолог“, во првите три дена, 20-22 април, ќе понуди попуст од 20-50 отсто на сите изданија, а првите сто купувачи ќе добијат и подарок. Меѓу другото, во текот на овие денови свои книги ќе потпишуваат писателите за деца и возрасни од повеќе генерации: Велко Неделковски, Александар Кујунџиски, Наум Попески, Сузана В. Спасовска, Душко Крстевски, Анета Попова, Ѓоко Здравески, Исток Улчар, Сузи Тенева, Гаврило Миловановиќ, Ацо Гогов, Сотир Ристо, Димитри Соле Љубин, Андреј Ал-Асади, Стефан Велковски, Живко Грозданоски, Борис Митковски и други, а преведувачките ќе го споделат своето лично искуство за книгите што ги преведувале.
„Можеби се прашувате од каде идејата да отвориме книжевен центар кој не е во строгиот центар на градот? Ако размислите, ќе заклучите дека токму најважните нешта во животот – мудроста, карактерот, љубовта, вистинскиот пријател, ретко ни биле на дофат на раката. Тоа е и нашата философија. Како кога на драгите луѓе им велите ’За тебе би отишол до крајот на светот!‘“, вели Жарко Кујунџиски, главен и одговорен уредник на ова книгоиздателство.