НЛБ Тутунска банка АД Скопје во текот на вчерашниот ден официјално ги објави неревидираните финансиски извештаи за првото полугодие од оваа година.
Според финансиските извештаи, во првaтa половина од 2014 година, нето каматните приходи се зголемени за 14,7% во однос на истиот период претходната година. Приходите од камати се зголемени за 1,9%, во најголем дел поради повисока состојба на кредитите на населението и помалиот износ на исправка на приход од камата. Расходите од камати се пониски за 13,0% што се должи на намалување на каматните стапки на депозити и помал износ на обврски по кредити и депозити од банки.
Нето приходите од провизии се зголемени за 4,6%. Приходите од провизии се зголемени за 6,6% како резултат на зголемување на обемот на работа што резултираше со остварени повисоки приходи од домашниот и девизниот платен промет, од картичното работење, од кеш центарот и од услугите преку деловната мрежа на Банката.
Расходите за провизии се зголемени за 13,5%, поради повисоките расходи од картичното работење, од кеш центарот и домашниот и девизен платен промет, при пониски расходи по провизии за обврските по кредитните линии. Останатите некаматни приходи изнесуваат 99.709 илјади МКД и се пониски за 14,8% во однос на претходната година, најмногу поради остварени пониски приходи од минатите години.
Вкупните приходи од работење изнесуваат 1.544.393 илјади МКД и се повисоки за 9,2%. Вкупните оперативни трошоци изнесуваат 801.760 илјади МКД и се повисоки за 15,9%, поради повисока споредбена основа.
Во првата половина од 2014 година се издвоени исправки на вредноста на финансиските средства, на нето основа во висина од 536.464 илјади МКД. Издвоените исправки соодветствуваат на структурата и на квалитетот на пласманите на Банката. Истовремено, со продажба на преземени средства врз основа на ненаплатени побарувања Банката оствари приход од ослободена ревалоризациона резерва во износ од 136.890 илјади МКД.
Нето добивката на Банката изнесува 353.182 илјади МКД и е повисока за 21,3% во однос на 2013 година.
