Квотата од Светската трговска организација за увоз на пченица, наместо шест месеци како досега, ќе трае цела година. Ова е едно од усвоените барања на мелничарите по работната средба во Министерството за земјоделство, шумарство и водостопанство.
Како што информира Групацијата на мелничко-пекарската индустрија при Стопанската комора на Македонија, предвидената квота од 80.000 тони е доволна, но преработувачите предложија увозот да почне по жетвата, од средината на јули, и да трае цела година, не само во првите шест месеци.
Министерството го прифати и барањето на Групацијата за намалување на димензијата на контролните маркици од брашното тип Б. Ќе биде намалена и цената, а точниот износ ќе се знае во мај годинава кога ќе биде распишан новиот тендер.
Во врска со нејаснотиите околу постапувањето со оштетените вреќи за брашно и аплицираните маркици е прецизирано дека секоја маркица ќе треба да се одлепи и во рок од пет дена по истекот на месецот да се предаде заедно со записник.
Мелничарите бараа контролните маркици да имаат различна боја зависно од пакувањата, како и да чинат најмногу 0,20 денари, при објавувањето на тендерот за нивно печатење, Групацијата да има свој претставник, квартално издавање маркици, како и издавање во подрачните единици на ресорното Министерство.