Компании од Курдистан, област во Северен Ирак, се заинтересирани за увоз на македонски земјоделски производи, особено овошје, но и за инвестиции. Сакаат да воспостават интензивни бизнис врски со партнери од земјава и значително да го подигнат нивото на соработка.
Како што беше речено на денешниот бизнис форум во Стопанската комора на Македонија, освен визите и немањето дипломатско-конзуларни претставништва, проблем за досегашната минимална размена се и оскудните информации меѓу двете земји за нивните економски услови, можностите, поволностите, потенцијалите.
„Имаме многу малку информации за македонското стопанство и трговија. Затоа и дојдовме тука, да се запознаеме непосредно, да воспоставиме директни односи со вашите компании, што ќе биде мост за натамошна соработка. Потенцијалот е огромен од двете страни, мора да се искористи“, рече Јасин Рахим Фарај од Трговско-индустриската комора на Сулејманија.
Курдистан реализира 17 отсто од вкупниот приход на Ирак. Брои 6,6 милиони жители, има широка автономија и е без царинско подрачје, богато со нафта и минерални суровини.
Претставува исклучителна можност за македонските компании од областа на градежништвото, туризмот, земјоделството… Атрактивни за соработка се и металниот сектор, како и фармацијата.
„Сакаме повторно да ја изградиме нашата економија, да постигнеме напредок во индустријата и земјоделството. Но, заинтересирани сме и за вложувања во Македонија. Досега увезувавме ваши производи, најмногу овошје, но сакаме соработката да ја прошириме на сите нивоа, како и директно да комуницираме со земјоделците“, напомена Рахим Фарај, изразувајќи уверување дека Курдистан е 100 процентно безбеден и може да се искористи за влез и освојување на Ирак.
Според Стопанската комора, размената меѓу Македонија и Ирак е незавидна. Сепак, за нас ова е перспективен пазар.
„Размената минатата година беше само 3,4 милиони долари што е 15 отсто намалување во однос на 2012-та. Максималната вредност од вкупно 7,5 милиони долари се постигна во 2011 година. Претходно, во 2010-та, по организираните средби со ирачки компании, се зголеми за трипати во однос на 2009-та. Притоа, доминраше извозот на свежо јаболко“, рече Љубица Нури од Комората.
Лани првпат се извезоа лекови и метални конструкции, што, според Нури, е охрабрувачки показател.
Во структурата на извозот најзастапени се земјоделските и прехранбените производи, цигарите и машинитe за печатење.
Со цел и официјално зацврстување на бизнис контактите, Трговско-индустриската комора на Сулејманија и Стопанската комора на Македонија денеска на форумот потпишаа Договор за соработка.
Деловната делегација од Сулејманија останува во Македонија до втори февруари.