Освежително кисел и цветен, чајот од хибискус е омилен пијалок за многумина. Освен што е вкусен, тој е поврзан и со можни здравствени придобивки – некои истражувања сугерираат дека може да помогне при висок крвен притисок.
Но, дали има смисла да се биде внимателен кога се пие? Експертите велат дека најважно е да се биде редовен, иако пиењето во одредено време од денот може да има дополнителни придобивки за некои, пишува „Health.com“.
Кога е најдобро време да го пиете?
Чајот од хибискус наутро, идеално помеѓу 6 и 10 часот наутро, може да биде добар избор ако го пиете за крвен притисок, вели нутриционистката Лиса Ендрус. Крвниот притисок често природно се зголемува наутро, а покачените вредности по будењето се поврзани со поголем ризик од коронарна срцева болест и мозочен удар. Затоа, можно е дека чаша хибискус наутро би можела да помогне токму во тој утрински период.
Сепак, диететичарката Шери Гау истакнува дека нема силни докази дека времето е клучно за ефикасноста.
„Се чини дека не е толку важно кога пиете чај од хибискус колку колку често го пиете“, рече таа.
Ендрус предупредува дека луѓето што земаат диуретици – лекови што често се препишуваат за висок крвен притисок – треба да бидат внимателни кога пијат хибискус.
„Бидејќи чајот од хибискус може да дејствува како благ природен диуретик, најдобро е да го пиете најмалку два часа по земањето на лекот, за да не се зголеми губењето на течности и да не се предизвика вртоглавица“, објасни таа.
Колку чај треба да пиете?
Студиите што ги испитувале ефектите од различни количини чај од хибискус врз крвниот притисок обично сугерираат две до три чаши дневно. Ендрус наведува една студија што открила дека две чаши дневно се поврзани со намалување на крвниот притисок, додека две други откриле значителни придобивки со три чаши дневно.
„Ефектите обично не се гледаат веднаш. Реално е да се очекува дека ќе бидат потребни најмалку четири недели редовна консумација“, рече Ендрус.
Гав се согласува, додавајќи дека прегледот на студиите од 2022-ра година открил позначајни подобрувања кај оние кои го пиеле чајот повеќе од четири недели.
Кој треба да биде претпазлив?
Како што споменавме, чајот од хибискус може да се меша со ефектите на одредени лекови за крвен притисок. Исто така, може негативно да реагира со имуносупресиви земени по трансплантација на црн дроб или бубрег, па затоа Гав советува секој што зема лекови на рецепт да се консултира со лекар пред редовно да го пие.
Луѓето кои веќе имаат хронично низок крвен притисок исто така треба да бидат претпазливи, бидејќи хибискусот може дополнително да го намали крвниот притисок. Бремените жени, доилките и жените кои се обидуваат да забременат можеби ќе сакаат да го ограничат или избегнат пијалокот.
„Чајот од хибискус содржи фитоестрогени, кои можат да влијаат на хормоналните процеси и потенцијално да ја комплицираат бременоста, доењето или планирањето бременост кај некои жени“, рече Гав.
Таа додаде дека извештајот за случај од 2023-та година предупредил за можното влијание на редовната консумација на чај од хибискус врз ин витро оплодувањето.
Конечно, вреди да се запомни дека хибискусот е само еден мал дел од приказната за крвниот притисок.
„Може да биде корисно, но подеднакво е важно да се држите до здрава исхрана за срцето – повеќе овошје и зеленчук, доволно калиум, помалку ултра-преработена храна и умерени количини на јаткасти плодови и семки“, заклучи Ендрус.
