Иако Охрид важи за бисерот на Балканот и е дестинација што со децении привлекува странски туристи, особено од Германија, се чини дека кај дел од нив сè почесто преовладува чувството – „евтино, ама скапо“.
Летувањето крај Охридското Езеро, барем според нивното искуство, не е веќе она што го ветуваат брошурите.
Група туристи од Хановер, сместени во еден приватен апартман во центарот на градот, изразуваат разочарување од она што го добиле за парите што ги платиле.
„Очекувавме автентично искуство, тивка атмосфера и домашна храна. Наместо тоа, секоја вечер имаше гласна музика до доцна, тешко се наоѓаше место за паркирање, а кога ќе седневме во ресторан, менито не беше преведено, а цените не се поклопуваа со она што го плативме на крај“, раскажува Бригите Хелман, пензионирана наставничка од Германија.
Германските туристи, кои традиционално се сметаат за економични и прецизни, велат дека проблемот не бил во цените, туку во вредноста што ја добиваат за истите.
„Плативме 35 евра за ноќевање по лице со појадок. Појадокот беше едно варено јајце, парче домат и тост. Во Германија за тие пари добиваме хотел и богата шведска маса“, додава нејзиниот сопруг, Вилфрид.
Туристичките работници во Охрид, пак, велат дека се трудат да понудат квалитетна услуга, но признаваат дека има простор за подобрување.
„Ние сме мал пазар и се бориме со кратка сезона. Дел од угостителите сакаат да заработат за три месеци што би заработувале цела година, па затоа понекогаш претеруваат со цените или штедат на услугата,“ вели Александар, менаџер на мал хотел во стариот дел од Охрид.
Дополнителен проблем е јазичната бариера. Дел од германските гости посочуваат дека во најголем дел од објектите, вработените не зборуваат англиски, а уште помалку германски. Тоа ја отежнува комуникацијата и остава впечаток на несериозност.
Туристичките работници со коишто разговаравме објаснуваат дека станува збор за системски недостатоци.
„Наместо да се потпираме на природната убавина и историјата на Охрид, мора да понудиме вистинско доживување. Туристите не доаѓаат само по езеро и сонце, туку по приказна, култура, гастрономија и квалитет. Ако не го добијат тоа, нема да се вратат, па ни по препорака“, вели Милан Јовановски, туристички работник.
Охрид и понатаму останува дестинација со потенцијал, но тој потенцијал ќе остане неискористен доколку летото за германските туристи продолжи да биде само една разочарана приказна.
Б.З.М.
