Работа во хотелските комплекси, берење маслинки на плантажите на Халкидики, грижа за постари лица во Солун или чување деца во Атина – Македонците сè почесто ја избираат соседна Грција како опција за заработувачка.
По неколкугодишното паузирање поради пандемијата и строгите правила за работа во Европската Унија, сега повторно има отворени можности за заработка кај нашиот јужен сосед.
Според последните податоци на агенциите за посредување при вработување, бројот на македонски граѓани кои бараат работа во Грција пораснал за речиси 40 отсто само во последните две години.
Причините се различни – од подобри финансиски услови до блискоста на земјата и лесното прилагодување на условите за работа.
Марија Стојчевска од Струмица веќе трета година работи на Халкидики во хотел како собарка. Иако работата е напорна, заработката е доволна за да ги покрие семејните потреби за остатокот од годината.
„Работам осум месеци годишно на првиот крак на Халкидики. Условите се добри, работата е тешка, но платата од околу 1.000 евра месечно е пристојна за нашите услови“, вели Стојчевска.
Таа додава дека во хотелот каде што работи има уште десетина луѓе од Македонија кои се на различни работни позиции – од келнери до готвачи и рецепционери.
Грчките плантажи за маслинки се уште едно место каде Македонците наоѓаат сигурен приход.
Ристо Митревски од Битола секоја година патува во регионот на Пела, каде работи сезонски на берење маслинки. За неколку месеци работа, заработува до 4.000 евра.
„Работиме од септември до декември. Работниот ден е долг, понекогаш и по 12 часа, но парите се солидни и сигурни. Грците сакаат да ангажираат работници од Македонија бидејќи сме работливи и дисциплинирани“, вели Митревски.
Во Солун и Атина, пак, Македонците најчесто се ангажирани како негователи на стари лица и деца.
Весна Јанчевска од Велес веќе 5 години работи како негувателка на стари луѓе во Солун. Вели дека за многу семејства таму Македонците се прв избор заради културната блискост и лесната комуникација.
„Грчкиот го зборуваме солидно, но што е поважно, луѓето овде имаат доверба во нас. Платата се движи од 600 до 800 евра месечно, но имам обезбедено сместување и храна. Тоа многу ми помага да заштедам“, објаснува Јанчевска.
Официјалната статистика од Министерството за труд и социјална политика покажува дека годишно над 5.000 Македонци се пријавуваат за сезонска работа во Грција. Од нив, најмалку половината ја повторуваат сезоната и наредната година.
Според експертите, ваквиот тренд на печалбарство во Грција ќе продолжи и наредниот период поради економските услови во Македонија, како и заради атрактивноста на заработувачката што грчките работодавци ја нудат за македонските работници.
Дека интересот за работа во Грција расте потврдуваат и од агенциите за посредување при вработување кои велат дека моментално побарувачката за македонски работници од грчките работодавци е двојно поголема од понудата.
„Добриот работник од Македонија брзо наоѓа работа во Грција. Имаме постојано отворени понуди, посебно во туристичката сезона и земјоделството. Луѓето се задоволни, и затоа интересот расте од година во година“, велат оттаму.
Се чини дека заработувачката од печалба повторно станува важен економски фактор, особено кога станува збор за соседна Грција, земја која нуди можности на само неколку часа возење од македонската граница.
Б.З.М.
