Богатството што го поседуваат светските милијардери порасна за околу 17% во изминатата година. Значителниот раст меѓу супербогатите во САД повеќе од компензира за падовите во Кина, објави швајцарската банка „UBS“.
Извештајот за милијардерски амбиции на „UBS“ за 2024-та година покажува дека вкупниот број на милијардери пораснал на 2.682 луѓе од 2.544 луѓе една година порано, а нивното богатство – на 14 трилиони од 12 трилиони долари. Во 2015-та година нивното богатство беше вкупно 6,3 трилиони долари.
Според Светската банка, населението на планетата е нешто повеќе од 8 милијарди луѓе минатата година и бруто домашниот производ (БДП) изнесуваше околу 105,4 трилиони долар, што само нагласува колку богатство е концентрирано во мал дел од човештвото.
Повеќето од овогодинешните нови милијардери се само-направени, за разлика од 2023-та година, кога новите милијардери стекнаа повеќе богатство преку наследство отколку преку претприемништво.
Наследниците на милијардерите од генерацијата на т.н повикани „бејби бумери“ (оние родени помеѓу 1946-та и 1964-та година) и нивните претпочитани филантропски цели се очекува да наследат 6,3 трилиони долари во следните 15 години. Тоа е повеќе од предвиденото во 2023-та година, бидејќи повеќе милијардери наполниле 70 години, а вредноста на имотот е зголемена.
Успехот на милијардерите го надмина и оној на пазарот на капитал во последните десет години. Во периодот помеѓу 2015-та и 2024-та година нивното вкупно богатство порасна за 121%. За споредба, меѓународниот индекс „MSCI AC World“ забележа послаб пораст од 73%, покажаа податоците во извештајот.
Овогодинешниот извештај, заснован на анкета на милијардери меѓу јуни и септември, како и податоци за нивното богатство, покажува дека ризикот од геополитички конфликти и инфлацијата се нивната главна грижа.
Истражувањето, исто така, покажа дека Северна Америка во големо мнозинство се смета за локација која нуди најдобар поврат на инвестицијата во наредната година.
Во САД, бројот на милијардери се зголеми на 835 луѓе од 751 лице, предводени од индустриски и технолошки тајкуни, чие вкупно богатство порасна на 5,8 трилиони од 4,6 трилиони долари.
Во Кина, бројот на милијардери падна на 427 од 520 луѓе, а нивното богатство се стопи на 1,4 трилиони од 1,8 трилиони долари. Во 2021-ва година во Кина имало 626 милијардери со вкупно богатство од 2,5 трилиони долари, покажуваат претходните пресметки на „UBS“.
Бенџамин Кавали, шеф на стратешки клиенти во „UBS Wealth Management“, рече дека намалувањето ги одразува загубите на пазарот на недвижности и падот на вредноста на компаниите во сопственост на некои од најбогатите луѓе во Кина во услови на понеизвесни економски прогнози.
Во исто време, бројот на милијардери во Индија се зголеми за повеќе од една петтина на 185 луѓе, а нивното богатство – за повеќе од 40% на речиси 906 милијарди долари, според „UBS“.
Во Западна Европа, Швајцарија ја престигна Велика Британија и сега е земја со втор најголем број милијардери по Германија, со пораст од десет луѓе на 85 лица.
Франција со 46 лица (зголемување од 12), Германија со 117 лица (плус осум), Италија со 62 лица (плус шест) и Шпанија со 27 (плус три) го зголемија бројот на милијардери, додека на Островот се намали за едно лице до 82 лица. Вкупното богатство на најбогатите во Франција беше најголемо од сите во Европа.
