Американските увозници моментално плаќаат просечна царина од 21 процент по контејнер, пресмета данската бродска компанија „Maersk“, што е половина од стапката на почетокот на април, веднаш по објавувањето на американскиот „царински бран“.
На 2 април, американскиот претседател Доналд Трамп објави дополнителни, „реципрочни“ царини за трговските партнери со кои САД долго време имаат трговски дефицит. Потоа ги одложи за три месеци поради преговори.
Во меѓувреме, САД воведоа дополнителна царина од 10 проценти за увоз на стоки од земји ширум светот и царина од 25 проценти за увоз на автомобили и автоделови, како и челик и алуминиум.
Веднаш по објавата на Трамп на самиот почеток на април, просечната ефективна царинска стапка скокна на 41 процент по контејнер, според пресметките на данската компанија. На почетокот на март, според нив, тоа беше 13 проценти.
До 11 април, тој веќе се искачи на 54 проценти, што го одразува ескалирањето на трговскиот конфликт меѓу САД и Кина.
До 11 мај, таа повторно се намали на 21 процент по контејнер, откако Вашингтон и Пекинг укинаа дел од давачките, забележува данската компанија во својот редовен извештај за глобалниот пазар.
„Целиот свет внимателно ќе го следи развојот на царинската состојба во јули и август, пред истекот на рокот поставен од САД за договор со своите партнери“, забележува Maersk.
Исходот од овие преговори ќе влијае на глобалната трговија и расположението на потрошувачите во наредните месеци, додадоа тие.
Во првата половина од годината, „Maersk“ забележа силен раст на побарувачката за контејнерски превоз на товар.
„Овој развој на настаните не беше сосема неочекуван, очекувавме дека клиентите ќе брзаат да нарачуваат за да ги предвидат најавените царински давачки“, соопшти „Maersk“.
Тие исто така додаваат дека многу од нивните големи клиенти во САД ја намалиле својата зависност од увоз од Кина во последниве години.
„Многу од нашите клиенти во секторот за мода и облека ја намалија својата зависност од Кина на едноцифрена бројка“, соопшти данската компанија.
Други сектори, како што се производителите на опрема за подобрување на домот, многу повеќе се потпираат на производството во Кина поради природата на овие стоки, додаваат тие.
