„Spotify“ ја лансираше својата вирална функција „Daylist“ на глобално ниво, проширувајќи ја на сите 180 пазари каде што е присутна платформата, истовремено додавајќи поддршка за 14 нови јазици, вклучувајќи арапски, италијански, германски и јапонски.
Оваа функција е достапна за корисниците ширум светот и им овозможува да уживаат во персонализирани плејлисти кои се прилагодуваат на нивното слушање во текот на денот.
Функцијата „Daylist“ нуди „хипер-персонализирани“ плејлисти кои се ажурираат неколку пати на ден, врз основа на музичките навики на корисникот. Во зависност од тоа што слушаат корисниците, алгоритмите создаваат плејлиста со помош на податоци за жанрот, темпото, расположението и другите музички карактеристики на песните. Иако алгоритмите се користат за креирање плејлисти, „Spotify“ јасно забележува дека овој процес не се заснова на генеративна вештачка интелигенција, туку на комбинација од податоци и музичко знаење на нивните експерти.
Густав Гјиленхамар, потпретседател на „Spotify“ задолжен за маркети и претплати, истакна дека функцијата „Daylist“ комбинира човечки и алгоритамски избор на музика за да им понуди на корисниците совршена рамнотежа.
„Се надеваме дека ќе ја најдеме вистинската рамнотежа помеѓу човечката курација и алгоритамската селекција“, рече Гјиленхамар.
„Spotify“ верува дека оваа функција дополнително ќе го зголеми ангажманот на корисниците, што е клучен фактор за преминување од бесплатен на платен модел на користење платформа.
„Spotify“ моментално има 626 милиони месечни активни корисници, но не ги исполни очекувањата од 631 милион корисници. Функцијата „Daylist“ има за цел да го зголеми бројот на корисници кои плаќаат, бидејќи „Spotify“ гледа директна врска помеѓу поголем ангажман на корисниците и нивната подготвеност да се надополнат до премиум верзијата на услугата.
Со зголемената конкуренција од социјалните платформи како „TikTok“, кои исто така нудат можности за откривање и создавање музика, „Spotify“ се надева дека преку функциите како „Daylist“ и годишниот преглед „Spotify Wrapped“, може да привлече повеќе корисници и да создаде поголеми културни моменти.
