Со приближувањето на есента, сезоната за подготовка на зимница во Скопје е во полн ек.
Домаќинките и домаќините со вешти раце и традиционални рецепти ги претвораат богатствата на природата во вкусни телги кои ќе ги збогатат трпезите во студените месеци.
Социјалните мрежи се преплавени со огласи за продажба на домашен ајвар, лутеница, малиџано, цвекло и други зимски специјалитети, што ја потврдува популарноста на овој традиционален обичај.
„Секоја година со нетрпение ја очекувам оваа сезона. Подготовката на зимница не е само начин да се заработи, туку и да се одржи врската со нашето културно наследство и да се сподели малку од нашата кујна со другите“, вели Босилка, домаќинка од Скопје која секоја есен подготвува зимница за своето семејство, но и за продажба.
Цените на овие домашни дела се разновидни. Ајварот се нуди по цени од 200 до 350 денари за пакувања од 470 до 900 грама, а и лутеницата и малиџаното се продаваат по слични цени.
Понудата е разновидна, со опции кои варираат од блага до екстра лута варијанта, што овозможува секој да најде нешто по свој вкус.
„Важно е да се користат квалитетни состојки и да се следат проверени рецепти. Моите клиенти се враќаат секоја година, благодарение на вниманието што го посветувам на секој чекор од процесот на подготовка“, објаснува Босилка.
Оваа традиција не само што ги зближува заедниците, туку и ги поттикнува луѓето да изберат здрава и природна храна.
Во време кога сè повеќе луѓе се обидуваат да избегнат индустриски произведена храна, домашната зимница останува посакуван избор за многумина.
„Социјалните мрежи ми овозможија да го проширам мојот бизнис и да стигнам до повеќе клиенти. Секоја порака и секоја нарачка е потврда дека традицијата и квалитетот сè уште се ценат“, вели нашата соговорничка.
Со зголемената свесност за значењето на здравата исхрана и желбата за враќање кон традиционалните вредности, сезоната за купување зимница се очекува да биде поуспешна од кога било.
Додека зимата полека се приближува, домаќинките како Босилка продолжуваат да ги чуваат и да ги споделуваат вкусовите на Македонија со светот.
Б.З.М.
