Просечната месечна исплатена нето-плата по вработен, во август годинава изнесува 21.108 денари, а просечната бруто плата 30.990 денари, соопшти денеска Државниот завод за статистика.
Просечната месечна исплатена нето и бруто плата по вработен, во август годинава е повисока за 0,7 отсто во однос на истиот месец лани.
Според податоците на Државниот завод за статистика, ваквото зголемување се должи, пред се, на зголемувањето на просечната месечна исплатена исплатена нето-плата по вработен во секторите: Транспорт и складирање (7 отсто), Други услужни дејности (6,7) и Рударство и вадење на камен (5,6 отсто), и на зголемувањето на бруто-платата по вработен во секторите: Транспорт и складирање (6,7 отсто), Рударство и вадење на камен (6,6) и Други услужни дејности (6,6 отсто).
Зголемување на просечната месечна исплатена нето-плата по вработен, во однос на претходниот месец, е забележано во секторите: Снабдување со вода; отстранување на отпадни води, управување со отпад и дејности за санација на околината (4,7 отсто), Снабдување со електрична енергија, гас, пареа и климатизација (3,8) и Транспорт и складирање (3 отсто).
Зголемување, пак, на просечната месечна исплатена бруто-плата по вработен, во однос на претходниот месец, е забележано во секторите: Снабдување со вода; отстранување на отпадни води, управување со отпад и дејности за санација на околината (4,9 отсто), Снабдување со електрична енергија, гас, пареа и климатизација (4,4) и Објекти за сместување и сервисни дејности со храна (2,3 отсто).
Во август 2013 година, 1,5 отсто од вработените во Република Македонија не примиле плата.
