Турција бара странски партнери во инфраструктурни мегапроекти кои претседателот Реџеп Ердоган ги гледа како симболи на напредокот на земјата за време на неговото 22-годишно владеење. Ова е дел од настојувањето на Турција да привлече инвестиции од странство, пишува „Bloomberg“.
Ахмет Бурак Далиоглу, шеф на државната Инвестициска канцеларија, која е одговорна за охрабрување на компаниите да инвестираат во Турција, рече дека се можни зделки за проекти изградени преку таканаречените јавно-приватно партнерство, кои се движат од автопатишта до здравствена заштита.
„Во тек се преговори за продажба на „градската болница“, една од 22-те што беа изградени за да се доведат помалите локации под еден покрив, на инвеститор од Заливот, а може да следат и други“, рече Далиоглу, без да образложи детали.
Турција стана голем корисник на јавно-приватно партнерство за време на Ердоган во неговите напори да ја модернизира старата инфраструктура на земјата, а претседателот често ги истакнуваше поединечните проекти на кампањата. Во овој модел, владата дава гаранции за кредити и приходи, а приватните компании преземаат изградба и работење.
Здравството беше меѓу секторите во Турција во кои Обединетите Арапски Емирати ветија дека ќе инвестираат во јули минатата година, како дел од пакетот вреден повеќе од 50 милијарди американски долари, кој се движи од енергија до одбрана. Но, сè уште не се постигнати значајни договори.
Далиоглу истакна дека очекува странските директни инвестиции во Турција да достигнат од 13 до 15 милијарди долари во 2024-та година, вклучително и од најмалку еден производител на автомобили. Ердоган му предложи на извршниот директор на „Tesla“, Илон Маск, да отвори фабрика во Турција на состанокот меѓу двајцата во септември.
Кинеската компанија „Chery Automobile“ исто така размислува за отворање фабрика во Турција, објави турскиот весник „Hurriyet“ минатиот април.
Околу 32 отсто од планираните државни инвестиции за 2024-та година ќе одат за транспорт и врски, се вели во Инвестицискиот план на Владата, објавен во Државениот весник.
Таа издвојува 319 милијарди турски лири (10,6 милијарди долари) за вкупно 773 големи проекти во транспортниот и комуникацискиот сектор оваа година, пишува „Hurriyet“. Планираните средства за јавни инвестиции годинава изнесуваат вкупно 1 трилион турски лири. Владините инвестиции во транспортот и врските годинава ќе пораснат за 162 отсто во однос на 2023-та година.
Инвестициите во образованието ќе бидат зголемени за 147 отсто во однос на 2023-та година и ќе достигнат 150,8 милијарди турски лири. Ова е еднакво на учество од 15% од вкупниот износ издвоен за јавни инвестиции.
Турската влада планира и 75,7 милијарди лири за енергетски инвестиции во 2024-та година, што е 70 отсто зголемување во однос на минатата година, од кои 46 милијарди лири ќе бидат инвестирани во наоѓалиштето Сакарија во Црното Море.
Турција, која работи на намалување на зависноста од странски енергетски ресурси, откри 710 милијарди кубни метри природен гас во Црното Море. Таа, исто така, се стреми да го зголеми дневното производство на нафта од областа Габар во југоисточниот дел на земјата од сегашните повеќе од 32.000 барели на 100.000 барели до крајот на оваа година. Ова ќе покрие 20 отсто од потребите на Турција.
Оваа година земјата планира да инвестира околу 101 милијарда турски лири во земјоделството, што е зголемување од 132 отсто во однос на 2023-та година. Земјоделскиот сектор има удел од 10 отсто во планираните јавни инвестиции во 2024-та година.
Јавните инвестиции во станбениот сектор и во рударската индустрија ќе изнесуваат 15,6 милијарди и 106 милијарди фунти, соодветно.
Во исто време, министерот за финансии на земјата, Мехмет Шимшек, на состанокот со гувернерите минатата недела ја истакна потребата од фискална дисциплина и мерки за намалување на трошоците.
„Треба да го намалиме буџетскиот дефицит, со исклучок на трошоците поврзани со земјотресот, на под 3 отсто од БДП“, рече тој, додавајќи дека дефицитот над тоа ниво е неуправлив. Шимшек ги повика гувернерите да преземат мерки за заштеда на трошоците.
Јавната потрошувачка мора да биде ефикасна, рече и министерот за финансии и побара од гувернерите внимателно да следат како се реализираат јавните инвестиции.
„Турција во моментов има два дефицита – и тековната сметка и буџетскиот дефицит, и двата се високи“, истакна Шимшек.
Минатата година беа издвоени околу 950 милијарди лири за санирање на штетите од земјотресот, а оваа година бројката ќе надмине 1 трилион лири, додаде тој.
